Gjatë javës në Kosovë pritet të karakterizohet me mot kryesisht të vranët, reshje të herëpashershme shiu dhe rënie të temperaturave. Në viset e larta malore parashihen edhe reshje bore.
Sipas parashikimit të Institutit Hidrometeorologjik të Kosovës, temperaturat gjatë javës do të jenë relativisht të ulëta, me ato maksimale që do të lëvizin nga 5 deri në 11 gradë Celsius.
Dita e parë e javës do të karakterizohet me mot kryesisht të vranët, ndërsa në disa zona mund të ketë reshje lokale shiu. Temperaturat minimale do të lëvizin nga 1 deri në 4 gradë Celsius, kurse ato maksimale nga 5 deri në 11 gradë.
Të martën pritet mot i vranët me reshje shiu në pjesë të ndryshme të vendit. Në viset e larta malore parashihen reshje të përziera shiu dhe bore. Temperaturat minimale do të zbresin nga 0 deri në 3 gradë, ndërsa maksimalet do të arrijnë nga 6 deri në 8 gradë Celsius.
Edhe gjatë së mërkurës do të ketë vranësira të shumta, ndërsa në disa zona priten reshje të dobëta shiu. Temperaturat minimale do të lëvizin nga 1 deri në 3 gradë Celsius, kurse maksimalet nga 5 deri në 9 gradë.
Të enjten moti do të vazhdojë të jetë kryesisht i vranët, me temperatura të ulëta. Temperaturat minimale do të sillen nga 0 deri në 3 gradë Celsius, ndërsa ato maksimale nga 5 deri në 8 gradë.
Në ditën e fundit të javës së punës, krahas vranësirave, pritet të ketë edhe intervale me diell. Temperaturat minimale do të zbresin nga -1 deri në 2 gradë Celsius, ndërsa maksimalet do të lëvizin nga 7 deri në 11 gradë.
Kushtet biometeorologjike, të pafavorshme për qytetarët
Sipas Institutit Hidrometeorologjik të Kosovës, kushtet biometeorologjike gjatë javës pritet të jenë të pafavorshme, si pasojë e vranësirave, reshjeve dhe temperaturave të ulëta.
Ndryshimet atmosferike dhe lagështia e shtuar mund të ndikojnë më shumë te personat e ndjeshëm ndaj ndryshimeve të motit, veçanërisht te ata që vuajnë nga sëmundje kronike, reumatike dhe probleme të sistemit të frymëmarrjes.
Qytetarëve u rekomandohet të vishen më ngrohtë dhe të kenë kujdes gjatë ditëve me temperatura të ulëta dhe reshje shiu.
Sa u përket kushteve agrometeorologjike, ato pritet të jenë përgjithësisht të favorshme për rimbushjen e lagështisë në tokë dhe zhvillimin e proceseve biologjike te kulturat bujqësore.
Reshjet e shiut do të kontribuojnë në përmirësimin e rezervave ujore në tokë, ndërsa temperaturat e ulëta do të ndikojnë në ngadalësimin e aktivitetit vegjetativ të bimëve.
Fermerëve u rekomandohet që periudhat pa reshje t’i shfrytëzojnë për përfundimin e punëve të mbetura të vjeshtës dhe përgatitjen e tokës për sezonin e ardhshëm bujqësor.
