Për shumë shqiptarë që kanë jetuar dhe punuar për vite me radhë në Zvicër, pensionimi është një etapë e rëndësishme që kërkon përgatitje. Njohja e të drejtave pensionale dhe e procedurave përkatëse është kyçe për të shmangur vështirësitë administrative në të ardhmen.
Për këtë arsye, organizata EPER, përmes programit «Âge et Migration» dhe me mbështetjen e Ministrisë së Punëve të Jashtme dhe Diasporës së Republikës së Kosovës, organizon dy takime informuese për komunitetin shqiptar.
Takimet synojnë të ofrojnë informacione të detajuara mbi të drejtat që burojnë nga Marrëveshja për Sigurimet Shoqërore ndërmjet Kosovës dhe Zvicrës, si dhe për procedurat e nevojshme për sqarimin e situatës pensionale.
Pse është e rëndësishme të informoheni në kohë?
Shumë bashkatdhetarë që i afrohen moshës së pensionimit ballafaqohen me pyetje rreth periudhave të punës në Kosovë, dokumenteve që duhen për të dëshmuar kontributet dhe ndikimit që kanë këto të drejta në të dy vendet. Informimi i hershëm është veçanërisht i rëndësishëm për personat që nuk i posedojnë më të gjitha dokumentet apo librezat e punës nga Kosova.Gjatë takimeve do të trajtohen këto çështje konkrete:
- Marrëveshja Kosovë–Zvicër: Çfarë parashikon ajo për sigurimet shoqërore dhe si ndikon në pensionin tuaj?
- Pensioni kontributdhënës në Kosovë: Kush ka të drejtë në të dhe si përcaktohet kjo e drejtë?
- Mungesa e dokumentacionit: Çfarë mund të bëjnë personat që nuk kanë dokumente për të dëshmuar vitet e punës në Kosovë?
- Përfitimet plotësuese (PC) në Zvicër: Si dëshmohet e drejta (apo mungesa e saj) për pension në Kosovë gjatë procedurave në Zvicër?
Bashkëbisedim direkt me zyrtarët nga Kosova
Në këto takime do të jetë i pranishëm Berat Zhinipotoku, udhëheqës i Divizionit për Pensione të Jashtme në Kosovë. Pjesëmarrësit do të kenë mundësinë të marrin sqarime të drejtpërdrejta lidhur me procedurat dhe institucionet përgjegjëse. Pas përfundimit të pjesës informative, do të organizohet një koktej ku bisedat mund të vazhdojnë në një atmosferë më joformale.
Datat dhe vendet e takimeve:
- GJENEVË
- Data: E enjte, 12 nëntor 2026
- Ora: 18:30
-
- Vendi: Konsullata e Përgjithshme e Republikës së Kosovës (Rue de Lausanne 63, 1202 Genève)
- RENENS
- Data: E premte, 13 nëntor 2026
- Ora: 19:00
- Vendi: Maison du Peuple, Renens
Thirrje për pjesëmarrje
Organizatorët ftojnë të gjithë bashkatdhetarët e interesuar, e veçanërisht ata që po i afrohen moshës së pensionimit dhe që kanë periudha pune të ndara mes Kosovës dhe Zvicrës, të marrin pjesë. Përgatitja për pension nuk duhet të lihet për momentin kur përfundon jeta profesionale; të jesh i informuar sot do të thotë të jesh më i sigurt financiarisht nesër.
Për informacione të mëtejshme:
- Kontakt: Luljeta Hajzeraj
- Tel.: +41 77 498 35 70
- Email: luljeta.hajzeraj@eper.ch
