Presidenti kinez Xi Jinping tha të enjten se rrjedha e historisë nuk mund të ndalet dhe bëri thirrje për “bashkimin” e plotë të Tajvanit me kontinentin. Ai premtoi se kjo do të arrihej në mënyrë paqësore, pa përmendur përdorimin e forcës, raporton Reuters.
Xi po fliste në Pekin në një tubim që shënonte 160-vjetorin e lindjes së Sun Yat-sen, themeluesit të Republikës së Kinës. Ai e quajti zgjidhjen e çështjes së Tajvanit një mision historik të palëkundur të Partisë Komuniste të Kinës.
“Rrjedha e historisë nuk mund të ndalet. Ribashkimi i plotë i atdheut duhet dhe me siguri do të arrihet”, tha Xi.
Ai shtoi se Kina mbetet e përkushtuar ndaj ribashkimit paqësor dhe politikës “një vend, dy sisteme”, dhe është e gatshme për bisedime me Tajvanin, duke respektuar parimin “një Kinë”, ose qëndrimin e Pekinit se të dyja anët e Ngushticës së Tajvanit janë një vend i vetëm.
Ai u bëri thirrje të gjithë kinezëve, përfshirë ata në Tajvan, të bashkohen kundër forcave “separatiste” që mbështesin pavarësinë e Tajvanit dhe të punojnë për zhvillimin paqësor të marrëdhënieve ndër-ngushticë.
Kina e konsideron Tajvanin e qeverisur në mënyrë demokratike si territorin e saj, një pretendim që autoritetet e Tajpeit e hedhin poshtë me vendosmëri. Pekini i ka ofruar Tajvanit një model autonomie “një vend, dy sisteme” për vite me radhë, i cili nuk mbështetet nga asnjë parti e madhe politike tajvaneze.
Qeveria e Tajvanit i hodhi poshtë fjalët e Xi-së si një përsëritje të pikëpamjeve të njohura.
“Kur bëhet fjalë për formulimin mbi ribashkimin e Tajvanit, nuk ka shumë ndryshim nga më parë”, tha Liang Wen-chieh, zëdhënës i Këshillit të Çështjeve Kontinentale të Tajvanit.
