Presidenti ukrainas Volodymyr Zelensky tha pas raundit të fundit të bisedimeve të paqes me Rusinë në Abu Dhabi se negociatorët amerikanë propozuan që Ukraina t’ia lëshonte rajonin lindor të Donbasit Rusisë në këmbim të anëtarësimit në NATO, njoftoi zyra e tij.
Zelensky përsëriti qëndrimin e tij se Ukraina nuk është e gatshme të tërhiqet nga territori i saj.
Zelensky: Një referendum është i mundur
“Amerikanët bënë pyetjen: ‘Po sikur Ukraina t’i bashkohet NATO-s? A do të tërhiqej Ukraina nga Donbasi?’ Kjo ishte hera e parë që u bë kjo pyetje”, tha Zelensky.
“Kjo është arsyeja pse besoj se NATO është rikthyer në axhendë. Por keni dëgjuar edhe sinjale nga (Presidenti rus Vladimir) Putin dhe kjo është një bisedë jashtëzakonisht e vështirë.”
Zelensky tha se do ta vinte çështjen në një referendum nëse Ukraina merr një paketë gjithëpërfshirëse sigurie që përfshin “garanci konkrete sigurie nga NATO dhe BE”, një ushtri ukrainase të fortë dhe të financuar mirë dhe fonde për rindërtim.
Nëse vendet perëndimore i konfirmojnë ato, “atëherë do ta pyes shoqërinë ukrainase se çfarë mendon për këtë: a e pranojmë apo jo? Unë nuk kam të drejtë ta marr vetë këtë vendim”, tha ai.
“NATO dhe BE janë e vetmja siguri e vërtetë për Evropën”
Ai theksoi gjithashtu se BE-ja dhe NATO-ja përfaqësojnë të vetmen “siguri të vërtetë” për Evropën dhe se përpjekja e Kremlinit për të ndryshuar arkitekturën e sigurisë së kontinentit është “e rrezikshme” dhe mund të çojë në luftëra të reja.
“Kjo është e rrezikshme sepse, sipas mendimit tim, këto janë llojet e gjërave që çojnë në luftëra ose përshkallëzime”, tha ai, duke shtuar: “Siguria e vërtetë për Evropën është BE-ja dhe NATO. Kaq është. Nuk ka siguri tjetër për Evropën.”
Bisedimet e paqes në Abu Dhabi, të mbajtura më 10 dhe 11 nëntor, përfunduan pa një marrëveshje për armëpushim.
