Një tërmet me magnitudë 7.7 ballë ka goditur bregun verilindor të Japonisë, tha Agjencia Meteorologjike e Japonisë. Epiqendra e tërmetit ishte e vendosur në bregun Sanriku në lindje të vendit, në një thellësi prej 10 kilometrash.
Një paralajmërim për cunami është lëshuar gjithashtu për pjesë të verilindjes së vendit. Banorëve u është thënë të “evakuohen menjëherë”.
Valët e para të cunamit kanë arritur në brigjet e Japonisë dhe sipas të dhënave nga agjencia meteorologjike lokale, vala më e lartë e matur deri më tani ka arritur 80 centimetra.
Zëdhënësi kryesor i qeverisë japoneze tha se deri më tani nuk ka raportime për lëndime ose dëme të mëdha. Agjencia e Menaxhimit të Zjarrfikësve dhe Fatkeqësive bëri një deklaratë të ngjashme, duke konfirmuar se nuk kishin raportime për dëme ose lëndime, përfshirë në termocentrale dhe objekte të tjera.Pas tërmetit që goditi verilindjen e Japonisë, një total prej 171,957 personash u urdhëruan të evakuoheshin.
Rekomandimet e lëshuara për evakuim nuk janë detyruese dhe vlejnë për banorët në prefekturat e Hokkaido, Aomori, Iwate, Miyagi dhe Fukushima.Pas një tërmeti të fuqishëm me magnitudë 7.7 ballë që goditi Japoninë sot, autoritetet u kanë bërë thirrje banorëve të jenë jashtëzakonisht vigjilentë gjatë javës së ardhshme. Kryeministri i Japonisë i ka kërkuar kombit të “mbetet në gatishmëri” për shkak të rrezikut në rritje të dridhjeve të mëtejshme.
Sanae Takaichi shpjegoi se ekziston një rrezik në rritje i lëkundjeve të mëvonshme, dhe madje një mundësi e vogël e një mega-tërmeti shkatërrues. Prandaj, ajo lëshoi një apel të veçantë për qytetarët.
“Për shkak të lëkundjeve të mundshme pasuese, u kërkojmë qytetarëve të jenë veçanërisht të kujdesshëm gjatë javës së ardhshme. Jini të përgatitur për evakuim emergjent dhe mbani gjithmonë me vete furnizime emergjente”, tha Takaichi.
Pavarësisht paralajmërimeve, Takaichi u bëri thirrje njerëzve të vazhdojnë me aktivitetet dhe punën e tyre të përditshme normale. Kërcënimi i menjëhershëm nga tërmeti që goditi më herët sot duket se po zvogëlohet.
