Administrata e Donald Trump planifikon të njoftojë aleatët këtë javë se do të zvogëlojë disa nga kapacitetet ushtarake amerikane të destinuara për të ndihmuar NATO-n në një krizë ose luftë të madhe.
Sipas Reuters, vendimi i referohet një kuadri të njohur si Modeli i Forcës së NATO-s, në të cilin anëtarët e aleancës përcaktojnë forcat që mund të aktivizohen në rast të një konflikti ose krize tjetër të madhe, përfshirë një sulm ndaj njërit prej anëtarëve.
Përbërja e saktë e forcave amerikane të përfshira në atë plan nuk dihet publikisht, por burimet thonë se Pentagoni ka vendosur të zvogëlojë ndjeshëm angazhimet e tij.
Një veprim i tillë përputhet me mesazhet e mëparshme të Presidentit të SHBA-së, Donald Trump, se vendet evropiane duhet të marrin përgjegjësinë kryesore për sigurinë e kontinentit.
Burimet pohojnë se qëllimi i Pentagonit duhet të njoftohet zyrtarisht të premten në një takim të udhëheqësve të politikës së mbrojtjes në Bruksel, ndërsa ende nuk është e qartë se me çfarë shpejtësie do të transferohet një pjesë e përgjegjësive të krizës te aleatët evropianë.
Sekretari i Përgjithshëm i NATO-s, Mark Rutte, u tha gazetarëve në Bruksel se nuk mund të jepte detaje mbi njoftimin e ardhshëm të SHBA-së, por tha: “Ishte e pritshme, mendoj se është mjaft e drejtë që të ndodhë.”
Në të njëjtën kohë, zyrtarët amerikanë thonë se SHBA-të do të vazhdojnë të ofrojnë një ombrellë bërthamore për anëtarët e NATO-s, megjithëse Evropa duhet të marrë rolin udhëheqës në forcat konvencionale.
Reuters deklaron gjithashtu se administrata Trump njoftoi reduktimin e rreth 5,000 trupave amerikane në Evropë në javët e fundit, përfshirë anulimin e vendosjes së një brigade në Poloni, gjë që rriti më tej shqetësimet e aleatëve evropianë në lidhje me të ardhmen e sigurisë transatlantike.
