Kryeministri në detyrë, Albin Kurti, ka njoftuar se ka përfunduar faza e parë e restaurimit dhe konservimit të kullës së Adem Qerim Osdautaj në fshatin Isniq, një monument me rëndësi historike që daton nga fillimi i shekullit XIX.
Përmes një postimi në Facebook, Kurti theksoi se institucionet do të vazhdojnë të punojnë në restaurimin dhe mbrojtjen e dëshmive të historisë dhe identitetit kombëtar.
Sipas tij, kulla ka qenë simbol i familjes shqiptare dhe i qëndresës së popullit ndër breza, ndërsa faza përfundimtare e restaurimit pritet të nisë së shpejti.
“Investimi në trashëgimi kulturore është investim në kujtesën tonë kolektive, gjurmët historike, identitetin kombëtar dhe zhvillimin kulturor e turistik të vendit”, ka shkruar Kurti.
