“Reforma në drejtësi është betejë për shtet që funksionon, ligj që zbatohet dhe drejtësi për të gjithë, pa dallim”. Kështu ka deklaruar Zëvendëskryeministrja dhe Ministrja e Drejtësisë në detyrë, Donika Gërvalla, gjatë vizitës së saj në Gjykatën Themelore në Gjakovë.
Ajo është pritur nga kryetarja e kësaj gjykate, Fëllanza Knushaj, me të cilën ka diskutuar për funksionimin e gjykatës, sfidat dhe prioritetet institucionale, si dhe trajtimin efikas të lëndëve dhe koordinimin ndërinstitucional në kuadër të reformave në drejtësi.
Gërvalla ka theksuar se reformat në drejtësi janë punë e përditshme dhe vendimmarrje serioze, duke shtuar rëndësinë e bashkëpunimit ndërinstitucional me ruajtjen e pavarësisë së sistemit gjyqësor.
Ajo ka deklaruar se forcimi i integritetit institucional dhe ndërtimi i një sistemi më efikas, transparent dhe të besueshëm mbeten prioritet i Ministrisë së Drejtësisë.
Sipas saj, një Republikë e fortë ndërtohet vetëm kur sundon ligji dhe drejtësia dhe kur institucionet ushtrojnë detyrat me transparencë dhe përgjegjësi.
