Delegacioni i organizatës Albanians For America (AFA) ka zhvilluar një drekë pune me Chris Gober, kandidat republikan për Dhomën e Përfaqësuesve të Shteteve të Bashkuara nga Distrikti i 10-të i Teksasit, ku u diskutua për vizionin e tij mbi zhvillimin ekonomik dhe teknologjik të SHBA-së.
Sipas njoftimit të AFA-së, bisedimet u fokusuan në zhvillimin e ekosistemit teknologjik në rajonin e Austin-it, si dhe në rëndësinë e ruajtjes së lidershipit amerikan në inteligjencën artificiale, robotikë, eksplorimin e hapësirës, prodhimin e avancuar dhe teknologjitë e reja. Në takim u trajtuan edhe çështje që lidhen me inovacionin, konkurrueshmërinë ekonomike dhe sigurinë kombëtare.
Delegacioni i AFA-së përbëhej nga Doc Vranici, Adrian Doko, Nino Rata dhe Gino Mulliqi. Përfaqësuesit e organizatës vlerësuan se lidershipi i SHBA-së në sektorët strategjikë të teknologjisë është thelbësor për zhvillimin ekonomik dhe ruajtjen e avantazhit strategjik të vendit.
AFA ka heksuar se marrëdhëniet me Chris Gober datojnë që nga themelimi i organizatës. Si këshilltar ligjor përmes firmës së tij “Lex Politica”, Gober ka kontribuar në krijimin e bazës organizative që, sipas AFA-së, ka ndihmuar në shndërrimin e saj në një nga organizatat më aktive të avokimit të komunitetit shqiptaro-amerikan në Shtetet e Bashkuara.
Në përfundim, Albanians For America ka shprehur gatishmërinë për të vazhduar bashkëpunimin me Chris Gober dhe i uroi suksese në garën për Kongresin e SHBA-së.
