Që nga fillimi i luftës në Ukrainë, të paktën 12 oligarkë rusë janë larguar nga bota në rrethana shumë të dyshimta. I fundit mes tyre është Dmitriy Zelenov (52), bashkëpronar i një kompanie të madhe ndërtimi, i cili në fillim të këtij mijëvjeçari konsiderohej një nga investitorët më të mëdhenj në Moskë.
Informacionin për vdekjen e ka konfirmuar “Komsomoljskaja Pravda”, duke shtuar se shkaku i vdekjes së Zelenovit nuk është sqaruar. Disa media raportojnë se, sipas informacioneve jozyrtare, pasaniku rus është sëmurë teksa po dilte nga shtëpia e miqve ku po darkonte. Më pas ai ra nga shkallët dhe goditi kokën. Miqtë kanë thirrur një ambulancë, e cila ka mbërritur menjëherë në vendngjarje. Mjekët e vendosën në terapi intensive, ku vdiq të nesërmen në mëngjes.
Sipas Baza, një nga grupet më të mëdha të Telegramit rus me afro një milion anëtarë, biznesmeni iu nënshtrua një operacioni për probleme në zemër në muajt para vdekjes së tij.
Perndryshe Zelenov dikur ishte në listën Forbes te miliarderëve rusë, por pas krizës financiare globale në 2008, ai humbi kompaninë e tij për shkak të borxheve. Më pas bleu një pjesë të kompanisë së ndërtimit Don-Stroi, e cila ishte e para që ndërtoi komplekse elitare banimi shumëkatëshe në Moskë.
Rrëzimi i papritur i helikopterit të miliarderit
Kjo është vetëm një në serinë e vdekjeve të dyshimta të rusëve të pasur. Miliarderi Viçeslav Taran (53) vdiq në fund të nëntorit. Themeluesi i platformës së tregtisë dhe investimeve Libertek dhe Forex Club, i cili besohet të ketë pasur lidhje të ngushta me shërbimet e inteligjencës ruse, ka vdekur në një aksident helikopteri në Zvicër.
Tabloidët britanikë pohuan se dy gjëra kanë ndodhur menjëherë para incidentit që e kanë bërë këtë rast të dyshimtë. Sipas deklaratave të tyre, në helikopter supozohej të ishte një pasagjer tjetër i paidentifikuar, por ai në momentin e fundit ka anuluar hipjen në fluturimin fatal. Një tjetër gjë që ngre dyshime është fakti se helikopteri i tij është rrëzuar në mot të mirë.
Zëvendës prokurori publik në Nicë ka vizituar vendin e aksidentit dhe ka thënë se nuk mund të përjashtojë fajin e një “pale të tretë”.
Pas lajmit për vdekjen, pala ukrainase njoftoi se ai ishte një “biznesmen kripto-miliarder” dhe e akuzoi atë si përgjegjës për “pastrimin e fondeve ruse përmes sistemit të operacioneve të kriptomonedhave”.
Në muajt e parë, më saktë deri në shtator, nëntë rusë të pasur vdiqën ose u vranë. Emri më i njohur ndër ta është drejtori i Lukoil Ravil Maganov i cili ra nga dritarja e dhomës së spitalit.
Pas vdekjes së tij, Lukoil lëshoi një deklaratë duke thënë se Ravil Maganov vdiq pas një “sëmundjeje të rëndë”. Megjithatë, mediat perëndimore e cilësuan këtë vdekje si të dyshimtë.
Kolegu i tij nga kompania, Alexander Subotin, ish-CEO i Lukoil, u gjet i vdekur në shtëpinë e shamanit më 10 maj në Mytishchi, Rusi. Një hetim u nis edhe pse Subotin dyshohet se kishte një atak në zemër.
Më pas, CEO i Gazprom, Leonid Shulman, u gjet gjithashtu i vdekur në një vilë në të njëjtin fshat në janar, përpara se Rusia të fillonte pushtimin e saj në Ukrainë. Pranë trupit të tij u gjet edhe një fletë lamtumire, në të cilën shkruhej se ai nuk dëshironte të ishte “invalid apo “barrë” për familjen dhe se ankohej për dhimbje torturuese në këmbën e thyer.
Hetuesit vunë në dyshim vërtetësinë e mesazhit të tij, duke shtuar se Shulman mund të përballonte qetësues të cilësisë së lartë.
Më pas, miliarderi Vasily Melnikov u gjet i vdekur në banesën e tij më 23 mars në Nizhny Novgorod. Ai u godit për vdekje me thikë, si dhe gruaja dhe dy djemtë e tij 10 dhe 4 vjeç.
Në vendngjarje u gjetën thika që dyshohet se ishte arma e vrasjes.
Përveç tyre, në rrethana të dyshimta vdiqën edhe oligarku Mihail Watford, ish nënkryetari i Gazprombank Vladislav Avayev, milionerët Sergej Protosenya dhe Yuri Voronov./Kosovatimes/
