Kryeministri britanik Keir Starmer deklaroi se Mbretëria e Bashkuar nuk ka luajtur asnjë rol në sulmet e ndërmarra nga SHBA-ja dhe Izraeli ndaj objektivave në Iran, ndërsa dënoi kundërpërgjigjen e Teheranit me sulme pa dallim në rajon.
Në një deklaratë të mbajtur më 28 shkurt 2026, Starmer tha se regjimi iranian “nuk duhet të lejohet kurrë të zhvillojë armë bërthamore”, duke theksuar se ky mbetet qëllimi kryesor i Londrës dhe aleatëve të saj, përfshirë SHBA-në.
Ai e cilësoi regjimin iranian si kërcënim të drejtpërdrejtë edhe për Mbretërinë e Bashkuar, duke përmendur se gjatë vitit të fundit janë mbështetur mbi 20 sulme potencialisht vdekjeprurëse në territor britanik.
Starmer dënoi sulmet e Iranit ndaj partnerëve në rajon, shumë prej të cilëve, sipas tij, nuk janë palë në konflikt, dhe shprehu solidaritet me ta.
Kryeministri njoftoi se forcat britanike janë aktive në rajon dhe avionët britanikë po marrin pjesë në operacione të koordinuara mbrojtëse për të mbrojtur personelin, interesat dhe aleatët e Mbretërisë së Bashkuar, në përputhje me të drejtën ndërkombëtare.
Ai bëri të ditur se janë rritur në nivelin më të lartë masat e sigurisë për bazat dhe personelin britanik, ndërsa autoritetet po kontaktojnë shtetasit britanikë në rajon për t’u ofruar mbështetje.
Starmer tha se ka zhvilluar biseda me liderë nga E3 (Britania, Gjermania, Franca) dhe vende të rajonit, duke theksuar se është jetike të parandalohet përshkallëzimi i mëtejshëm dhe t’i kthehet procesit diplomatik.
“Irani mund ta ndalë këtë tani”, u shpreh ai, duke i bërë thirrje Teheranit të përmbahet nga sulme të tjera, të heqë dorë nga programet e armatimit dhe të ndalë dhunën ndaj popullit iranian./ Burimi: gov.uk
