Agjencia e Statistikave të Kosovës (ASK) ka publikuar të dhënat për tregtinë e jashtme të mallrave për muajin qershor 2026, të cilat tregojnë se deficiti tregtar ka vazhduar të rritet, ndërsa eksportet mbulojnë 15 për qind të importeve.
Sipas ASK-së, deficiti tregtar në qershor 2026 arriti në 578.3 milionë euro, që paraqet një rritje prej 16.1 për qind krahasuar me të njëjtën periudhë të vitit të kaluar, kur ishte 498.3 milionë euro.
Gjatë këtij muaji, eksporti i mallrave arriti në 102 milionë euro, duke shënuar rritje prej 26.9 për qind në baza vjetore. Në të njëjtën kohë, importi u ngjit në 680.3 milionë euro, ose 17.6 për qind më shumë se në qershor 2025.
Në strukturën e eksporteve dominojnë metalet bazë dhe artikujt prej tyre me 27.4 për qind të totalit, të pasuara nga ushqimet e përgatitura, pijet dhe duhani (12.7 për qind), plastika, goma dhe artikujt prej tyre (10.6 për qind), artikujt e ndryshëm të prodhuar (8.7 për qind) dhe produktet minerale (7.1 për qind).
Sa i përket importeve, pjesën më të madhe e zënë produktet minerale me 15.2 për qind, makineritë dhe pajisjet mekanike e elektrike me 13 për qind, mjetet e transportit me 12 për qind, ushqimet e përgatitura, pijet dhe duhani me 11.9 për qind, si dhe metalet bazë dhe artikujt prej tyre me 9.8 për qind.
BE-ja mbetet partneri kryesor tregtar
Eksportet e Kosovës drejt vendeve të Bashkimit Evropian arritën në 32.5 milionë euro, duke përbërë 31.9 për qind të eksporteve totale dhe duke shënuar rritje prej 17.7 për qind. Destinacionet kryesore ishin Gjermania, Holanda dhe Italia.
Nga ana tjetër, importet nga vendet e BE-së arritën në 304.9 milionë euro, ose 44.8 për qind të importeve totale, me rritje prej 22.2 për qind. Pjesa më e madhe e mallrave u importua nga Gjermania, Italia dhe Polonia.
Rritje edhe në tregtinë me vendet e CEFTA-s
Eksportet drejt vendeve të CEFTA-s arritën në 44 milionë euro, ose 43.1 për qind të eksporteve totale, me rritje prej 19.3 për qind. Partnerët kryesorë ishin Maqedonia e Veriut, Shqipëria, Mali i Zi dhe Serbia.
Ndërkohë, importet nga vendet e CEFTA-s kapën vlerën e 98.7 milionë eurove, duke përbërë 14.5 për qind të importeve totale, gjithashtu me rritje prej 19.3 për qind.
Sa i përket vendeve të tjera, eksportet arritën në 25.5 milionë euro, ku partnerët më të rëndësishëm ishin Zvicra dhe Turqia. Importet nga këto vende arritën në 276.7 milionë euro, me Kinën dhe Turqinë si burimet kryesore të mallrave të importuara.
