Senati i SHBA-së hodhi poshtë me një diferencë të ngushtë votash të enjten një mocion procedural që përpiqej të fillonte një debat mbi një rezolutë që do të kufizonte autoritetin e Presidentit Donald Trump për të kryer operacione ushtarake kundër Iranit, raporton Anadolu.
Senati, me 50 vota kundër dhe 49 pro, hodhi poshtë propozimin për tërheqjen e rezolutës nga komisioni dhe vendosjen e saj për shqyrtim. Masa u propozua nga senatorja demokrate Kirsten Gillibrand.
Çfarë kërkonte rezoluta?
Rezoluta bënte thirrje për tërheqjen e forcave amerikane nga armiqësitë kundër Iranit që nuk ishin autorizuar nga Kongresi, përveç nëse Kongresi shpallte posaçërisht luftë. Meqenëse propozimi nuk mori shumicën e thjeshtë të nevojshme, rezoluta mbetet e bllokuar në Komitetin e e Marrëdhënieve me Jashtë të Senatit, duke ruajtur në mënyrë efektive fuqitë ushtarake të presidentit.
“Kjo luftë e papërgjegjshme po rrit kostot mujore dhe po e bën jetën e përditshme të familjeve punëtore më të vështirë”, tha Gillibrand përpara votimit, duke u bërë thirrje senatorëve të riafirmojnë autoritetin kushtetues të Kongresit.
Pas humbjes, ajo kritikoi republikanët në Senat për votimin për të vazhduar “luftën e shtrenjtë” në vend që të qëndronin “me popullin amerikan”.
Përçarje brenda partive
Votimi tregoi më pak përçarje brenda të dyja partive. Tre republikanë, Susan Collins, Lisa Murkowski dhe Rand Paul, e mbështetën propozimin, ndërsa demokrati John Fetterman iu bashkua shumicës republikane dhe votoi kundër tij. Senatori republikan i Kentucky-t, Mitch McConnell, nuk votoi.
