Shtatë ditë me fluturime të anuluara, vonesa dhe devijime në aeroportet anembanë Siçilisë kanë lënë mijëra turistë të bllokuar në ishullin italian, ndërsa mali Etna vazhdon të nxjerrë re hiri pas shpërthimit të javës së kaluar.Vullkani më aktiv i Evropës ka nxjerrë sasi të mëdha hiri dhe fragmente shkëmbinjsh të kuq të nxehtë që nga e premtja. Rrjedha të dendura lave po dalin nga dy shfryrje në lartësi prej 2,360 metrash dhe 2,750 metrash, sipas Institutit Kombëtar të Gjeofizikës dhe Vullkanologjisë (INGV) të Italisë.
Aeroporti i Katanias u mbyll edhe të mërkurën
Aeroporti i Katanias është aktualisht nën nivelin më të lartë të alarmit të kuq. Vlerësohet se dhjetëra mijëra njerëz janë të prekur, disa prej të cilëve po flenë në aeroport. Ai do të jetë i mbyllur deri të paktën në orën 6 pasdite, dhe ndërkohë janë formuar dy rrjedha të reja lave.
Operacionet ajrore janë ndërprerë që nga e premtja dhe hapësira ajrore është mbyllur plotësisht vetëm në ditët e fundit. Meqenëse është kulmi i sezonit të verës me një numër të madh turistësh të huaj në ishull, kjo situatë shkakton probleme serioze.Shumë udhëtarë tani po përpiqen të përdorin aeroportin në kryeqytetin e ishullit, Palermo, ose trenin si një alternativë.
800 euro për një udhëtim me taksi
Por të shkosh nga Catania në Palermo dhe Trapani nuk është aspak e lehtë. Autobusët janë të mbipopulluar, makinat me qira janë të vështira për t’u gjetur, transporti publik është i pakët dhe taksitë janë të shtrenjta. Hotelet dhe agjencitë kanë frikë nga anulimet dhe dëmtimi i ndjeshëm i reputacionit. Sipas VAAC (Qendrës Këshillimore për Hirin Vullkanik) në Tuluzë, reja e hirit ka arritur një lartësi prej rreth 5,500 metrash dhe po lëviz drejt jugut dhe jugperëndimit, dhe sasi të kufizuara janë regjistruar në Maltë dhe Libi, shkruan Corriere della Sera .
Është një emergjencë e paparashikueshme që deri më tani ka lënë 30,000 pasagjerë të “ngujuar”, me kampe të improvizuara edhe në fushat jashtë aeroportit Vincenzo Bellini Fontanarossa, shkruan
La Stampa , duke shtuar se kjo ka krijuar një mundësi të artë për shoferët e taksive që kërkojnë deri në 800 euro për një udhëtim në anën tjetër të Siçilisë. Edhe të shkosh nga Palermo në Catania, nëpërmjet autostradës katastrofike A19, plot me kantiere ndërtimi dhe rrugë anashkaluese, është një aventurë e vërtetë, shton La Stampa.
