Kryetari i Lidhjes Demokratike të Kosovës, Lumir Abdixhiku, ka vizituar të premten një familje, ku burri dhe gruaja janë punonjës shëndetësor.
Abdixhiku ka shkruar në Facebook se pagat e këtij çifti sot vlejnë 50 për qind më pak se para dy vjetësh, derisa siç ka thënë, koeficienti i Qeverisë nuk mbulon as për së afërmi inflacionin.
“Kafen e mëngjesit këtë të premte e piva me familjen e mrekullueshme të Lulzim e Nesibe Thaqi. Si prindër të tre fëmijëve e në pritje të të katërtit, burim të vetëm të të hyrave kanë pagat që marrin nga sektori publik. Si punonjës shëndetësorë, punë të vetme kanë kujdesin për tjetrin. Janë adresa e parë e secilit me hall. Shteti, ndërsa, punë të vetme duhej ta kishte kujdesin për ta. Pagat e tyre sot vlejnë 50% më pak, se sa para dy viteve; derisa koeficienti i Qeverisë nuk mbulon as për së afërmi inflacionin rekord që ka goditur familje si kjo. Realiteti i hidhur është se, historia e tyre nuk është e vetme. Kjo histori përballjeje ndahet nga familje të panumërta anembanë Kosovës”, ka shkruar Abdixhiku.,
Sipas tij, propozimi i LDK-së për koeficient me vlerë prej 125 euro lehtëson përballueshmërinë e familjeve si kjo.
“Propozimi ynë për heqje të TVSH-së në produkte bazë – bukë, miell, vaj, sheqer, qumësht e vezë – do të bënte jetën e tyre shumë më të lehtë”, ka shtuar ai.
Dy ditë më parë, Qeveria e Kosovës ka bërë publik vlerën e koeficientit i cili është 105 euro. Vendimi ka nxitur reagimet e shumë punonjësve të sektorit publik. /Kosovatimes/
