Shpërthime u dëgjuan të shtunën, më 7 nëntor, në ishullin Qeshm , në Ngushticën e Hormuzit , si dhe në portin e Jask, në Iranin jugor , sipas mediave iraniane. Deri më tani, nuk ka pasur asnjë deklaratë zyrtare nga autoritetet iraniane mbi origjinën e shpërthimeve.
Më herët të shtunën, agjencia gjysmëzyrtare e lajmeve Tasnim raportoi se dy raketa goditën ishullin Qeshm, por nuk kishte informacion zyrtar në lidhje me dëmet e mundshme.
Agjencia iraniane e lajmeve Tasnim citon një burim sipas të cilit shpërthimet e dëgjuara në ishullin Qeshm nuk lidhen me sulmet me raketa .
Raportet për shpërthime vijnë vetëm disa ditë pas sulmeve amerikane në ishull. Një zyrtar amerikan tha se sulmet ishin të kufizuara në fushëveprim dhe nuk përbënin një rifillim të operacioneve ushtarake në shkallë të gjerë.
Vendet në rajon prisnin që Presidenti i SHBA-së Donald Trump, i cili kishte shmangur sulme të reja ndaj Iranit në javët para zgjedhjeve të mesmandatit të martën, më 3 nëntor, mund t’i përsëriste sulmet pasi të përfundonte procesi zgjedhor.
Nga ana e tij, Teherani ka paralajmëruar vazhdimisht se do t’i përgjigjet çdo sulmi të ri, duke goditur objektiva amerikane dhe izraelite në vendet fqinje.
Një reporter i televizionit shtetëror iranian vlerësoi se shpërthimet mund të lidhen me aktivitetet e forcave të armatosura iraniane në Ngushticën e Hormuzit.
Me informacion nga Reuters
