Zvicra nuk do të jetë në gjendje të konfiskojë asetet e ngrira ruse në favor të Ukrainës, pasi kjo do të shkelte kushtetutën dhe ligjin federal. Konkluzione të tilla janë bërë nga një grup pune në kuadër të departamentit, sipas një shpjegimi në faqen e internetit të Këshillit Federal të Zvicrës.
“Shpronësimi i aseteve private me origjinë legjitime pa kompensim nuk lejohet sipas ligjit zviceran. Konfiskimi i aseteve private të ngrira është në kundërshtim me Kushtetutën Federale dhe rendin ligjor aktual dhe shkel detyrimet ndërkombëtare të Zvicrës. Të drejta dhe garanci të ngjashme kushtetuese ka edhe në vende të tjera”, thuhet në reagimin e grupit të punës.
Grupi përfshinte përfaqësues nga Sekretariati Shtetëror për Çështjet Ekonomike (SECO), Sekretariati Shtetëror për Financat Ndërkombëtare (SIF) dhe Zyra e së Drejtës Ndërkombëtare (DIL). Ata siguruan se Zvicra do të vazhdojë të mbështesë Ukrainën.
Autoritetet e vendit kujtuan se konfiskimi i mundshëm i rezervave valutore të Bankës Qendrore Ruse dhe aseteve të tjera shtetërore, si dhe dënimet më të ashpra për shkeljen e regjimit të sanksioneve, po diskutohen tani në nivel ndërkombëtar. Zvicra po i ndjek nga afër këto propozime dhe po kontribuon në diskutime”, thuhet në deklaratë.
Në fund të vitit 2022, Komisioni Evropian ngriti çështjen e mundësisë së konfiskimit të aseteve të ngrira ruse. Autoritetet zvicerane, në përgjigje, deklaruan se nuk kishte baza ligjore: për një hap të tillë, legjislacioni kombëtar duhet të ndryshohet. Siç theksohet nga botimi Zuger Zietung, një referendum është i nevojshëm për të ndryshuar legjislacionin zviceran. Në total, rreth 50 miliardë dollarë fonde ruse janë deklaruar në vend./Kosovatimes/