Partia e krahut të djathtë gjermane, Alternativa për Gjermaninë (AfD), dhe i dërguari kryesor ekonomik i Putinit kanë filluar përgatitjet për një takim në fillim të vitit 2027 për të diskutuar rifillimin e furnizimeve me gaz rus në Gjermani, ka mësuar Reuters nga burime pranë organizatës.
Edhe pse AfD është e izoluar nga qeveria sepse partitë e tjera refuzojnë një koalicion me ta, aktualisht është opsioni politik më i popullarizuar midis votuesve gjermanë. Takimi i planifikuar thekson më tej lidhjet e ngushta midis Moskës dhe këtyre opsioneve të krahut të djathtë.
Sipas burimeve, në takim pritet të marrë pjesë Kirill Dmitriev , një këshilltar i ngushtë i Vladimir Putinit dhe kreu i fondit rus të investimeve, dhe bashkëkryetarët e AfD-së, Alice Weidel dhe Tino Chrupalla . Zëdhënësit e AfD-së dhe Dmitriev nuk pranuan të komentojnë zyrtarisht mbi akuzat.
Takimi do të zhvillohej vetëm me kushtin që të arrihet më parë një marrëveshje paqeje midis Rusisë dhe Ukrainës, dhe organizatorët shpresojnë që një takim në terren neutral, si Izraeli, Emiratet e Bashkuara Arabe ose India, mund të bashkojë përfaqësues të AfD-së, Rusisë dhe SHBA-së.
Vladimir Putin, Yuri Ushakov dhe Kirill Dmitriev
Takimi i planifikuar, megjithëse simbolik për shkak se AfD nuk është në pushtet, vjen në një kohë kur kjo parti po shënon suksese të mëdha zgjedhore. Pasi fitoi zgjedhjet në Saksoni-Anhalt, AfD triumfoi në zgjedhjet provinciale në Mecklenburg-Pomerania Perëndimore këtë fundjavë, në rajonin ku ndodhen pikat hyrëse të gazsjellësit North Stream.
Presidenti i Dhomës Amerikane të Tregtisë në Moskë,
Robert Agee, e mirëpriti idenë e bisedimeve, duke e quajtur atë një ‘hap pozitiv dhe në kohën e duhur’.
Reagime të ashpra dhe akuza për tradhti
Iniciativa e AfD-së për t’u rikthyer te gazi rus u dënua ashpër në Berlin.
Michael Kellner , një deputet i të Gjelbërve që udhëhoqi politikën energjetike gjatë krizës pas pushtimit rus, paralajmëroi për rrezikun e përsëritjes së të njëjtave gabime: “Gjermania nuk duhet ta lejojë veten të bëhet përsëri e varur nga Rusia. Kriza energjetike na kushtoi 50 miliardë euro. Kthimi në mënyrën e vjetër do të ishte i barabartë me tradhti – Putini thjesht po e përdor AfD-në për qëllimet e tij.”
Roderich Kiesewetter nga CDU ishte gjithashtu i ashpër
Pavarësisht kritikave, AfD shpreson që ky veprim do t’u tregojë votuesve aftësinë e saj në politikën e jashtme dhe do të nxjerrë në pah paaftësinë e qeverisë aktuale për të luftuar çmimet e larta të energjisë, përfundon Reuters .
