Një video është publikuar në rrjetet sociale ku shihet Felix Savon, një kampion tre herë olimpik në boks, duke kontrolluar një enë dhe duke thënë se po mbledh ushqim.
Videoja u nda nga boksieri profesionist kubanez Gustavo Trujillo, dhe ende nuk dihet se ku dhe kur është regjistruar.
Burri që e filmonte nga makina e pyet:
“Kampion, çfarë po ndodh? Savon, çfarë po bën, mik?”, dhe ish-boksieri përgjigjet: “Po mbledh ushqim, diçka për të ngrënë”.
Sipas portalit Cuba Noticias 360, pasi pamjet u bënë virale, komediani kubanez Limay Blanco i dha Savonës një pako me ushqime dhe një Bibël, të dërguara nga kisha e tij, Cristo Cambia Vidas.
“Çfarëdo që të ketë bërë ai person, ndihmojeni dhe ecni përpara,” tha Blanco.
Savon është një nga emrat më të mëdhenj në historinë e boksit amator. Boksieri kubanez i peshave të rënda fitoi tre medalje ari olimpike radhazi, në Barcelonë në vitin 1992, në Atlanta në vitin 1996 dhe në Sydney në vitin 2000, një sukses i arritur vetëm nga Teofilo Stevenson dhe Laszlo Papp.
Përveç medaljeve të arta olimpike, ai fitoi gjashtë tituj botërorë, katër medalje ari në Kupën e Botës, tre në Lojërat Pan Amerikane dhe katër në Lojërat e Amerikës Qendrore dhe Karaibeve. Ai nuk u bë kurrë profesionist dhe refuzoi oferta milionash për t’u ndeshur me Mike Tyson sepse boksi profesional ishte i ndaluar në Kubë.
Emri i Savonit është lidhur gjithashtu me akuza serioze vitet e fundit. Gazetari i pavarur kubanez Abraham Jimenez Enoa raportoi në vitin 2018 në revistën Gatopardo se Savoni ishte në paraburgim, i akuzuar për abuzim seksual me një të mitur pasi familja e një fëmije 12-vjeçar e denoncoi atë. Autoritetet kubane nuk kanë publikuar kurrë zyrtarisht detaje të aktakuzës, gjyqit apo vendimit.
CubaNet raportoi në janar 2025, duke cituar burime të paidentifikuara, se Savon u lirua me kusht në fund të vitit 2024 pas gjashtë vitesh burg. Nuk dihet se mbi çfarë baze ai mori lirim me kusht, as nuk dihet se në çfarë situate ndodhet sot.
