Sigal Prishtina ka shënuar fitore dramatike në udhëtim ndaj Rahovecit 029, duke triumfuar me rezultat të ngushtë 94:97, në një ndeshje mjaft interesante dhe me rivalitet deri në fund.
Bardhekaltërit arritën të dalin fitues në një përballje të luftuar, duke regjistruar fitoren e dytë në katër xhirot e para të kampionatit.
Te skuadra vendase, Mika Adams ishte basketbollisti më i dalluar me 30 pikë, nëntë kërcime dhe shtatë asistime, por paraqitja e tij nuk mjaftoi për ta shmangur humbjen.
Në anën tjetër, Bryson Dawkins shkëlqeu te Sigal Prishtina, duke kontribuar me 25 pikë, 13 kërcime dhe shtatë asistime në fitoren e rëndësishme të kryeqytetasve.
Pas katër xhirove të zhvilluara, Sigal Prishtina ka bilanc prej dy fitoreve dhe dy humbjeve, ndërsa Rahoveci 029 vazhdon të kërkojë fitoren e parë të sezonit, pasi ka pësuar katër humbje radhazi.
