Princi Harry i Britanisë u paraqit sot në gjykatë në Londër, ku një avokat që përfaqëson një grup tabloidësh britanikë synon të kërkojë rrëzimin e padisë kundër princit dhe personazheve të tjerë të famshëm për përgjime telefonike dhe cenim të privatësisë së tyre.
Kjo seancë dëgjimore është pjesë e një prej disa padive që Princi Harry, Duka i Sussex, ka ngritur kundër mediave. Seanca pritet të zgjasë katër ditë dhe prania e Princit Harry në Gjykatën e Lartë në Londër është një shenjë e rëndësisë që ai i kushton çështjes.
Grupi mediatik Associated Newspapers, botues i gazetave të tilla si Daily Mail, po i kërkon gjykatës të hedhë poshtë pretendimet e disa individëve të profilit të lartë që kërkojnë dëmshpërblim për abuzim mediatik dhe përvetësim të paligjshëm të informacionit të tyre privat. Të tjerë që kanë paditur mediat përfshijnë këngëtarin Elton John, bashkëshortin e tij David Furnish dhe aktoret Liz Hurley dhe Sadie Frost.
Kur padia u publikua në tetor të vitit të kaluar, grupi mediatik e hodhi poshtë atë si “shpifje groteske”.
Një seancë paraprake katër-ditore në Gjykatën e Lartë në Londër që fillon sot do të shqyrtojë argumentet ligjore dhe gjyqtarët do të vendosin nëse çështja mund të vazhdojë, transmeton Beta.
Ardhja e paparalajmëruar e Princit Harry vjen pak më shumë se një muaj pas kurorëzimit të babait të tij, mbretit Charles III, më 6 maj. Princi Harry dhe gruaja e tij Meghan kanë jetuar në SHBA që kur njoftuan se do të largohen nga detyrat zyrtare për monarkinë në vitin 2020. Princi dhe gruaja e tij ishin të ftuar në kurorëzimin, por ende nuk dihet nëse e kanë pranuar ftesën.
