Policia ndërhyri dje në një dyqan qebapësh të sapohapur në Dortmund, në Gjermaninë perëndimore, pasi qindra klientë u dyndën në hapje, të tërhequr nga çmimi promocional i një qebapi prej vetëm një eurosh.
Pronari i restorantit u detyrua të telefononte policinë sepse nuk mund ta kontrollonte më turmën. Sipas pronarit, rreth 1,000 njerëz u mblodhën jashtë restorantit, ndërsa policia vlerësoi se ishin afërsisht 300, raporton Guardian .
Pronari kishte reklamuar një ofertë speciale për qebapë vetëm për një euro. Në Gjermani, çmimi i një qebapi doner, një pjatë me mish të marinuar të pjekur në hell vertikal dhe të servirur me perime në një simite të ngrohtë ose tortilla, zakonisht varion midis 7.50 dhe nëntë euro.
Pronari punësoi roje private sigurie.
Deri afërsisht në vitin 2020, një qebap kushtonte midis 3.50 dhe 4 euro. Rritja e ndjeshme e çmimeve, kryesisht për shkak të çmimeve më të larta të energjisë dhe ushqimeve, e ka shndërruar ushqimin e shpejtë më të popullarizuar në Gjermani në një nga simbolet më të dukshme të inflacionit të përditshëm. Në Gjermani, shiten më shumë se 1.3 miliardë porcione qebapësh çdo vit.
Pronari i restorantit punësoi roje private sigurie për të ruajtur rendin gjatë hapjes. Megjithatë, shpejt u bë e qartë se ata nuk mund ta kontrollonin turmën, kështu që policia u thirr pasi situata doli jashtë kontrollit.
Mbërritja e policisë shkaktoi trazira shtesë. Sipas zëdhënësit të policisë, turma hodhi shishe, gurë, piroteknikë dhe skuterë elektrikë drejt policisë. Për shkak të përshkallëzimit të dhunës, u thirrën përforcime dhe në fund, rreth 100 policë dhe një helikopter policie ishin në terren.
Shefi i Policisë: Disa nga turma kishin ndërmend të sulmonin policinë që në fillim
Shefi i policisë së Dortmundit, Tim Frommeyer, e dënoi me forcë dhunën. “Kushdo që përdor dhunën, në këtë rast përsëri kundër oficerëve të policisë, nuk është një i ri që kërkon aventura apo një shkaktar i zakonshëm problemesh, por një kriminel”, tha Frommeyer në një deklaratë.
Ai akuzoi disa nga të mbledhurit se kishin ndërmend të sulmonin policinë që në fillim, duke theksuar se një sjellje e tillë përputhet me modelin e dhunës që është regjistruar në tubime dhe protesta kohët e fundit.
Disa persona u arrestuan gjatë ndërhyrjes. Njërit prej të ndaluarve iu gjet një pistoletë me gaz. Disa persona përballen me akuza për prishje të rendit publik, dëmtim të pronës dhe fyerje të të tjerëve.
Policia nuk ka zbuluar nëse pronari i restorantit do të përballet me akuza penale apo kundërvajtjeje për ngjarjen e hapjes. Pronari tha pas incidentit se do t’i dhuronte të gjitha qebapët e mbetur për një organizatë bamirësie lokale që ndihmon të pastrehët.
