Presidenti turk, Recep Tayyip Erdogan, shprehu keqardhjen e tij të thellë për viktimat civile në Iran, duke paralajmëruar se konflikti, nëse nuk ndërhyhet urgjentisht, do të ketë pasoja të rënda për sigurinë rajonale dhe globale. Ai tha se Turqia do të intensifikojë përpjekjet diplomatike për të vendosur një armëpushim.”Irani është fqinji ynë. Populli iranian, me të cilin kemi qenë në paqe dhe qetësi që nga viti 1639, janë vëllezërit tanë, njësoj si popujt e tjerë në rajon. Ne kemi jetuar krah për krah në paqe për shekuj me radhë. Inshallah, me vëllezërit tanë iranianë do të jetojmë krah për krah në paqe dhe qetësi për shumë shekuj të tjerë. Ne ndajmë dhimbjen e tyre dhe jemi thellësisht të trishtuar kur shohim këtë vuajtje, ku civilët dhe fëmijët e pafajshëm mbajnë peshën kryesore të konfliktit”, tha Erdogan në Ankara.
Udhëheqësi turk theksoi se vendi i tij do të intensifikojë kontaktet diplomatike derisa të vendoset një armëpushim dhe të rivendoset paqja në rajon.
“Ne qëndrojmë në anën e paqes. Duam që gjakderdhja të ndalet, lotët të ndalen dhe rajoni ynë më në fund të arrijë paqen e qëndrueshme që ka dëshiruar”, tha Erdogan, duke shtuar se përparësia e Ankarasë është të sigurojë një armëpushim dhe të hapë derën për dialog.
Ai paralajmëroi për pasoja katastrofike nëse konflikti nuk ndalet.
“Nëse nuk bëhet ndërhyrja e nevojshme, ky konflikt do të ketë pasoja të rënda për sigurinë rajonale dhe globale. Askush nuk mund t’i durojë pasiguritë ekonomike dhe gjeopolitike që do të sillte një proces i tillë. Kjo është arsyeja pse ky zjarr duhet të shuhet përpara se të përhapet më tej”, tha Erdogan.
Pas sulmit ndaj Iranit dhe përplasjeve të mëvonshme, Erdogan foli në telefon me Sekretarin e Përgjithshëm të NATO-s, Mark Rutte.
Sipas një deklarate nga Drejtoria e Komunikimit të Turqisë, Erdogan i tha Rutte-s se Turqia po “monitoron nga afër konfliktin në rajon”, duke theksuar se dhënia e një shansi diplomacisë është çelësi për arritjen e paqes së qëndrueshme.
Erdogan e informoi gjithashtu Rutte-n se janë duke u zhvilluar përgatitjet për Samitin e Liderëve të NATO-s, i cili do të mbahet në Ankara në korrik, dhe premtoi se Turqia do ta presë ngjarjen në një mënyrë që i përshtatet rëndësisë së ngjarjes. Rutte tha se NATO “do të vazhdojë të kontribuojë në sigurimin e sigurisë së aleatëve të saj nga një perspektivë 360 gradë”.
