Kryetari i LDK-së, Lumir Abdixhiku ka thënë se subjekti i tij ka bërë vazhdimisht përpjekje për të bërë një marrëveshje edhe politike, edhe për një konsensus të gjerë për zgjedhjen e presidentit, por LDK s’ka pasur fuqi të sigurojë ato 85 vota.
Ai tha se tani kur kanë mbetur më pak se dy orë deri te skadimi i afatit kushtetues për zgjedhjen e presidentit, pret që në mesnatë të bëhet shpërbërja e legjislaturës aktuale.
“Kosova po futet drejt një procesi të ri zgjedhor. Në orën 12:00 të mesnatës LDK pret dekretin për shpërbërjen e Kuvendit dhe sa më parë edhe nisjen e konsultimeve për caktimin e datës së zgjedhjeve të jashtëzakonshme”, tha Abdixhiku.
Ai tha se LDK ka pasur gatishmëri të plotë për konsensus, por se sipas tij, kjo gatishmëri nuk është përputhur me synimet e palëve tjera.
“Seancën e tanishme e konsiderojmë monopartiake. Kemi dy kandidatë të një partie. Kështu nuk arrihet konsensusi. Ne kemi qenë në pozicion të ofrimit të marrëveshjes por nuk na është ofruar asnjë emër”, shtoi ai.
