Komandanti i Forcës së Sigurisë së Kosovës (KOMFSK), gjenerallejtënant Bashkim Jashari, priti sot në takim rreshter-majorin Komandues të Gardës Nacionale të Ajovës (IANG), Matthew T. Strasser.
FSK njofton se gjatë takimit, u diskutua për bashkëpunimin e shkëlqyer ndërmjet FSK-së dhe Gardës Nacionale të Ajovës, me fokus të veçantë në zhvillimin dhe avancimin e trupës së nënoficerëve.
Gjeneral Jashari vlerësoi kontributin e partnerëve amerikanë, e posaçërisht të Gardës Nacionale të Ajovës, në ndërtimin e një strukture të fortë dhe profesionale të nënoficerëve brenda FSK-së.
Nga ana tjetër, rreshter-majori i Komandës Strasser vlerësoi lart lidershipin e gjeneral Jasharit në mbështetje të zhvillimit të karrierës ushtarake për të gjithë personelin e FSK-së, e në veçanti për mbështetjen e dhënë korit të nënoficerëve të FSK-së, duke theksuar rëndësinë dhe përkushtimin për zhvillimin e nënoficerëve si shtylla kryesore e FSK-së.
Në fund të takimit, komandanti i FSK-së, gjenerallejtënant Bashkim Jashari, e dekoroi rreshter-majorin e Komandës Strasser me medaljen “Shërbim Vetëmohues” për mbështetjen e vazhdueshme ndaj Forcës së Sigurisë së Kosovës.
