Irani ka hedhur poshtë një plan për t’i dhënë fund luftës kundër Izraelit dhe Shteteve të Bashkuara, pasi Amerika dërgoi një dokument me 15 pika si një propozim për t’i dhënë fund konfliktit, i cili hyri në javën e katërt, raportoi Press TV iraniane.Sipas një zyrtari iranian të paidentifikuar, Irani nuk dëshiron të lejojë që Presidenti i SHBA-së Donald Trump të diktojë se kur do të ndalet lufta.
“Irani do ta ndalë luftën kur të vendosë ta bëjë këtë dhe kur të plotësohen kushtet tona”, tha ai.
Ai theksoi gjithashtu se Teherani do të vazhdojë me mbrojtjen e vendit, si dhe sulmet ndaj vendeve armike.
Sipas këtij zyrtari, Uashingtoni inicioi hapjen e negociatave për t’i dhënë fund konfliktit, por gjithashtu se kushtet e tyre të propozuara janë “të papranueshme dhe të tepërta”.
Në përgjigje, Irani deklaroi pesë kushte që Teherani pret të përmbushen për të ndaluar luftën, përkatësisht: ndërprerje e plotë e sulmeve ndaj Iranit; krijimi i mekanizmave për të parandaluar sulmet e përsëritura; pagesa e garantuar dhe e përcaktuar e dëmeve të luftës; ndërprerja e luftës në të gjitha frontet, duke përfshirë grupet në rajon; njohja ndërkombëtare se vetëm Irani ka sovranitet mbi Ngushticën e Hormuzit.
Ata deklarojnë se këto kushte i shtohen kërkesave të mëparshme që u paraqitën gjatë negociatave në Gjenevë në fund të shkurtit, përpara fillimit të sulmit amerikano-izraelit ndaj Iranit.
Gjithashtu u tha se mesazhi për kushtet për një armëpushim iu përcoll të gjitha vendeve që shprehën gatishmërinë e tyre për të qenë ndërmjetës në këtë konflikt.
“Nuk do të ketë negociata para se të përmbushen kushtet. Fundi i luftës do të ndodhë kur Irani të vendosë, jo kur Trump ta imagjinojë”, tha një zyrtar iranian për Press TV.
