Partia Demokratike e Kosovës e konsideron skandaloze ekspozitën e fundit për masakrat e luftës 1998–1999, duke theksuar se shtrembëron të vërtetën historike dhe cenon dinjitetin e viktimave dhe familjeve të tyre.
“Çdo përpjekje për t’i relativizuar krimet e kryera në Kosovë, për t’i manipuluar faktet apo për ta deformuar të vërtetën, është jo vetëm e papranueshme, por edhe e rrezikshme për kujtesën kolektive dhe drejtësinë historike”, thuhet në komunikatën e PDK-së.
PDK ka kërkuar sqarim publik për mënyrën e përgatitjes dhe miratimit të ekspozitës, identifikimin e përgjegjësve për financimin dhe promovimin e saj, kërkimfalje ndaj familjeve të viktimave, si dhe hetim për mundësinë e veprave penale, përfshirë keqpërdorimin e detyrës zyrtare dhe shpërdorimin e parasë publike.
“Kosova nuk mund ta ndërtojë të ardhmen e saj mbi deformimin e së vërtetës. Respekti për viktimat dhe mbrojtja e historisë sonë janë detyrime themelore shtetërore.PDK do të qëndrojë gjithmonë në mbrojtje të së vërtetës, dinjitetit të viktimave dhe vlerave të luftës çlirimtare”, thuhet komunikatë .
