Prokuroria në Gjakovë kërkon paraburgim për një shtetas shqiptar, i dyshuar për posedim dhe shpërndarje të 5.4 kg marihuanë, të sekuestruar gjatë kontrollit policor në automjetin e tij.
Prokuroria Themelore në Gjakovë, Departamenti për Krime të Rënda, njofton se ndaj të pandehurit A.B., shtetas i Republikës së Shqipërisë, ka paraqitur kërkesë në Gjykatën Themelore Gjakovë për caktimin e masës së paraburgimit në kohëzgjatje prej 30 ditësh.
Sipas prokurorisë, më 3 prill 2026, rreth orës 12:30 në rrugën “Megzon Boshnjaku”, në parkingun e restorantit “O….”, i pandehuri dyshohet se ka poseduar dhe transportuar substanca të ndaluara pa autorizim, me qëllim shitjen ose shpërndarjen.
Gjatë kontrollit të kryer nga Policia e Kosovës në automjetin e tij “Ford Focus”, janë sekuestruar dhjetë qese me marihuanë, në peshë totale prej 5 kg e 413 gr. Po ashtu, janë sekuestruar automjeti dhe dy telefona që i pandehuri përdorte për transportimin e narkotikëve.
Me këto veprime, A.B. dyshohet për veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge” sipas nenit 267 par.2 të KPRK-së.
I pandehuri ndodhet nën masën e ndalimit 48 orësh që nga data 3 prill 2026.
