Nëntë policë janë dënuar me vdekje në Indi për vdekjen e një babai dhe të birit gjatë paraburgimit në vitin 2020.
P. Jeyaraj (58) dhe djali i tij Benicks (38) vdiqën në paraburgim në shtetin jugor indian Tamil Nadu, disa ditë pasi u arrestuan për dyshimin se kishin mbajtur hapur një dyqan telefonash celularë në shkelje të masave të izolimit gjatë pandemisë së koronavirusit.
Gjykatësi tha se dy burrat u zhveshën lakuriq dhe u rrahën brutalisht. Ai e përshkroi rastin si një abuzim të qartë të pushtetit. “Ata e bënë me qëllimin për t’i vrarë”, theksoi ai.
Oficerët, të cilët u shpallën fajtorë për vrasje muajin e kaluar, kanë të drejtë të apelojnë. “Ata sulmuan njerëz të paarmatosur. Ata nuk duhet të falen. Atyre nuk duhet t’u jepen dënime më të lehta për shkak të moshës ose statusit të tyre familjar. Ata janë të gjithë të arsimuar”, tha gjykatësi në dhënien e dënimit.
Njëri nga të pandehurit vdiq nga koronavirusi
Gjithsej dhjetë oficerë policie u arrestuan për vdekjen brutale të një babai dhe të birit, por njëri prej të akuzuarve vdiq nga koronavirusi në vitin 2020. Rasti shkaktoi protesta në Tamil Nadu, me politikanë të opozitës midis atyre që dolën në rrugë.
Udhëheqësi i opozitës Rahul Gandhi dhe ylli indian i kriketit Shikhar Dhawan përdorën mediat sociale për të kërkuar drejtësi për dy burrat. Vdekjet e babait dhe të birit kanë sjellë vëmendje të re ndaj problemit të brutalitetit policor në Indi.
Organizatat e të drejtave të njeriut paralajmërojnë se çdo vit qindra njerëz vdesin në paraburgim në Indi dhe theksojnë se tortura dhe keqtrajtimi për të nxjerrë rrëfime janë bërë pjesë e praktikës policore.
Më herët këtë vit, disa ekspertë të Kombeve të Bashkuara i bënë thirrje Indisë të ndërmarrë reforma rrënjësore për të modernizuar forcën e saj policore në përputhje me standardet ndërkombëtare të të drejtave të njeriut.
