Presidenti rus Vladimir Putin mbajti një fjalim në paradën në Moskë, e cila tradicionalisht organizohet më 9 maj, Ditën e Fitores mbi Fashizmin.
Fjalimi i Putinit u përqendrua ekskluzivisht në ngjarjet e Luftës së Dytë Botërore, dhe ndryshe nga fjalimet e mëparshme që nga viti 2022, kur ai nisi pushtimin e Ukrainës, nuk pati shumë referenca për ngjarjet aktuale.
“Ne e festojmë festën tonë të shenjtë, të ndritshme dhe më të rëndësishme me një ndjenjë krenarie dhe dashurie për vendin tonë, me vetëdijen për detyrën tonë të përbashkët për të mbrojtur interesat dhe të ardhmen e atdheut. Ne e festojmë atë me mirënjohje të sinqertë dhe birnore ndaj brezit të madh të fituesve. Ne i ruajmë me shenjtëri betimet dhe trashëgiminë e ushtarëve të fitores”, tha Putin.
Ai deklaroi se populli sovjetik “shpëtoi botën” dhe se fitorja ndaj Gjermanisë naziste ishte fundi i së keqes totale dhe të pamëshirshme.
“Ai u riktheu sovranitetin vendeve që kapitulluan para Gjermanisë së Hitlerit dhe u bënë bashkëpunëtorë të nënshtruar të krimeve të saj. Ushtari ynë pësoi humbje dhe sakrifica të mëdha në emër të lirisë dhe dinjitetit të popujve të Evropës. Ai u bë mishërimi i guximit dhe fisnikërisë, i qëndrueshmërisë dhe i njerëzimit”, tha ai.
Në fjalimin e tij, ai iu referua ditës kur udhëheqja e Gjermanisë naziste vendosi të sulmonte Bashkimin Sovjetik në vitin 1941, duke e quajtur ditën kur filloi sulmi ndaj vendit “një nga datat më tragjike dhe më të trishtueshme” në historinë ruse.”Duket se strategët nazistë i morën parasysh me përpikëri të gjitha, përveç njërës – atë që quhet karakteri rus dhe forca e shpirtit të popullit sovjetik. Këto cilësi dalin në pah me forcë të veçantë në momentet më të vështira për atdheun. Populli ynë qëndroi si një mur në rrugën e armikut dhe tregoi se besnikëria ndaj atdheut është e vërteta më e madhe që mund të bashkojë miliona njerëz”, tha Putin.
Përveç ushtrisë, ai vlerësoi edhe shtresat e tjera të shoqërisë dhe rolin e tyre në ngjarjet e viteve 1940.
“Pranë ushtarëve rusë janë punëtorë dhe ndërtues, inxhinierë, shkencëtarë dhe shpikës. Ata vazhdojnë traditat e paraardhësve të tyre dhe, duke u mbështetur në përvojën moderne luftarake, krijojnë modele të përparuara dhe unike të armëve dhe fillojnë prodhimin e tyre masiv. Por, pavarësisht se si ndryshojnë teknikat dhe metodat e luftës, gjëja kryesore mbetet e pandryshuar. Fati i vendit përcaktohet nga populli. Luftëtarët dhe punëtorët e fabrikave, punonjësit e ndërmarrjeve bujqësore, prodhuesit e armëve dhe reporterët e luftës, mjekët dhe mësuesit, punonjësit e kulturës dhe priftërinjtë, vullnetarët, sipërmarrësit, bamirësit – të gjithë qytetarët e Rusisë. Garantuesi i suksesit është forca jonë morale dhe shpirtërore, guximi dhe heroizmi, uniteti dhe aftësia jonë për të duruar gjithçka dhe për të kapërcyer çdo tundim”, tha presidenti rus.
Në të vetmen referencë për luftën aktuale në Ukrainë, të cilën ai vazhdon ta quajë një “operacion ushtarak special”, Putin tha se “ushtria heroike e Rusisë” në Ukrainë do të fitojë kundër “një force agresive të mbështetur nga NATO”.
Në fund të fjalimit të tij, ai tha se të gjithë qytetarët e Rusisë kanë një qëllim të përbashkët dhe se “fitorja farkëtohet në fushën e betejës dhe në prapavijë”.
“Unë besoj fuqimisht se kauza jonë është e drejtë. Ne jemi bashkë. Fitorja ka qenë dhe do të jetë gjithmonë e jona”, tha Vladimir Putin.
