Policia amerikane njoftoi sot se ka sekuestruar më shumë se 30 armë zjarri dhe një hark nga objektet e lidhura me adoleshentët që vranë tre persona në një xhami në San Diego.
Mark Remily, agjent special përgjegjës për zyrën e FBI-së në San Diego, tha se forcat e rendit kryen tre kontrolle në adresat e lidhura me të dyshuarit dhe sekuestruan shumë pistoleta, pushkë, pushkë gjahu, municione, pajisje taktike dhe pajisje elektronike në dy lokacione.
“Ne gjithashtu kemi shqyrtuar pajisjet elektronike që të dyshuarit kishin me vete në kohën e incidentit dhe jemi në proces të marrjes së urdhër-arresteve shtesë për pajisjet e gjetura në automjetin që ata po përdornin”, tha ai.
“Ata padyshim që ushqenin urrejtje të përhapur për shumë njerëz”
Remily tha se hetuesit kanë gjetur materiale të shkruara mbi të dyshuarit pas të shtënave dhe po punojnë për të marrë urdhër-arreste shtesë për pajisjet e gjetura në vendngjarje.
“Ne ende po shqyrtojmë pajisjet elektronike për të marrë përgjigje, por ajo që mund të them është se ato padyshim që ushqenin urrejtje të përhapur për shumë njerëz”, tha ai.
Të shtënat po hetohen si krim urrejtjeje.
Autoritetet besojnë se të dyshuarit, identitetet e të cilëve nuk janë bërë të ditura zyrtarisht, përveç faktit që janë 17 dhe 18 vjeç, janë takuar në internet. Ata ende nuk kanë specifikuar se çfarë ideologjish apo besimesh mbështesnin.
Shumë media i identifikuan të dyshuarit si Cain Clark (17) dhe Caleb Vazquez (18).
NBC News, duke cituar një zyrtar anonim të distriktit shkollor, raportoi se Clark kishte ndjekur një shkollë të mesme online dhe ishte planifikuar të diplomohej më vonë këtë muaj.
Aktualisht nuk ka informacione shtesë rreth Vazquez.
Roje xhamie e vrarë duke mbrojtur besimtarët
Policia njoftoi se të dy të dyshuarit vdiqën nga plagët e shkaktuara vetë me armë zjarri, pasi sulmuan xhaminë dhe hapën zjarr ndaj një punëtori të peizazhit disa blloqe më larg.
Qendra Islamike e San Diegos identifikoi një nga viktimat si Amin Abdullah, një roje sigurie në objekt, i cili u vra duke u përpjekur të mbronte anëtarët e komunitetit “deri në momentet e fundit”.
“Policia thotë se veprimet e tij parandaluan që sulmi të ishte shumë më i keq”, postoi qendra në Instagram.
