Tetë trupa të copëtuar u gjetën të dielën (09/08) të varrosur fshehurazi brenda një miniere të paligjshme në provincën Asuay, Ekuador, njoftoi policia e vendit.
Trupat ishin “varrosur në një thellësi prej rreth dy metrash”, kishin duart e lidhura dhe tregonin “plagë të tilla si copëtim dhe prerje koke ” që ishin shkaktuar me hanxharë, shpjegoi për shtypin Pablo Iga, një oficer i lartë i policisë gjyqësore.
Viktimat u gjetën në zonën e Pukarës, ku minierat e paligjshme të arit dhe bakrit janë intensifikuar vitet e fundit. Zona konsiderohet të dominohet nga banda Los Lobos (“Ujqërit”) .
Sipas analizave paraprake, trupat u varrosën në minierë afërsisht dy ditë më parë. Identitetet e viktimave nuk janë konfirmuar në këtë fazë.
Pavarësisht politikës së goditjes ndaj bandave , “luftës” së shpallur ndaj bandave nga presidenti i krahut të djathtë Daniel Noboa, dhuna nuk ndalet në Ekuador, ku bandat përleshen për kontrollin e rrugëve të trafikut të drogës dhe aktivitetit të paligjshëm të minierave.
Policia ishte vendosur në zonën e paarritshme kur mori informacion për të shtëna me armë zjarri.
Banorët raportuan zhdukjet e njerëzve të tyre tek autoritetet.
Asuay është ndër dhjetë provincat në Ekuador që kanë qenë në gjendje të jashtëzakonshme që nga qershori për shkak të një shpërthimi të dhunës me armë.
Ekuadori, dikur një oaz paqeje dhe qetësie në Amerikën Latine, vitet e fundit është bërë vendi më i rrezikshëm në të gjithë rajonin. Në vitin 2025, shkalla e vrasjeve arriti në 51 për 100,000 banorë , më e larta në të gjithë Amerikën e Jugut, sipas të dhënave nga InSight Crime.
Burimi: APE-MPA
