Ministri në detyrë i Financave, Hekuran Murati, ka bërë të ditur se buxheti i ndarë për komunat e Kosovës në vitin 2027 pritet të arrijë në 907 milionë euro.
Murati ka njoftuar se Ministria e Financave javën e kaluar ka lëshuar qarkoren e dytë buxhetore për komunat, përmes së cilës janë përcaktuar kufijtë buxhetorë për secilën komunë.
Sipas tij, rritja e buxhetit për komunat është mundësuar nga rritja e të hyrave buxhetore gjatë viteve të fundit.
“Falë performancës së jashtëzakonshme të të hyrave buxhetore përgjatë viteve të fundit, është krijuar hapësira fiskale për rritje të vazhdueshme të buxhetit që u ndahet komunave”, ka shkruar Murati.
Ai ka krahasuar shumën e planifikuar për vitin 2027 me atë të vitit 2021, kur, sipas tij, buxheti për komunat ishte 546 milionë euro.
“Nga 546 milionë euro sa e kishim gjetur në vitin 2021, buxheti i ndarë për komunat do të shkojë në 907 milionë euro në vitin 2027”, ka deklaruar Murati.
