Një person është arrestuar në Ferizaj nën dyshimin për lëndim të lehtë trupor dhe posedim të paautorizuar të armës.
Sipas policisë, rasti ka ndodhur të mërkurën, rreth orës 21:30, në një fshat të Ferizajt, pasi policia kishte pranuar informatë për një rast të lëndimit trupor.
Njësitet policore kanë dalë në vendin e ngjarjes dhe kanë identifikuar personat e përfshirë. Gjatë veprimeve policore, nga i dyshuari, 55-vjeçar, është sekuestruar një armë zjarri, një pistoletë, së bashku me një karikator dhe tre fishekë.
Sipas hetimeve fillestare, dyshohet se pas një mosmarrëveshjeje familjare, 55-vjeçari ka sulmuar bashkëshorten e tij, ndërsa gjatë ndërhyrjes ka pësuar lëndime trupore edhe vajza e tyre.
Palët e përfshira janë shoqëruar në stacionin policor në Ferizaj dhe janë intervistuar nga njësia e hetimeve.
Në konsultim me prokurorin e shtetit, rasti është iniciuar për veprat penale “Lëndim i lehtë trupor” dhe “Mbajtja në pronësi, kontroll ose posedim të paautorizuar të armëve”.
Me vendim të prokurorit, i dyshuari është ndaluar për 48 orë, ndërsa hetuesit policorë po vazhdojnë hetimet për të sqaruar plotësisht rrethanat e rastit.
