Është hapur njësia e përbashkët e kontrollit në Aeroportin Ndërkombëtar të Prishtinës “Adem Jashari”, ndërmjet Doganës dhe Policisë së Kosovës.
Kjo njësi është hapur me qëllim forcimin e kontrollit të udhëtarëve dhe ngarkesave dhe për rritjen e bashkëpunimit ndërinstitucional në luftën kundër krimit të organizuar dhe trafikimit të paligjshëm.
“Hapja e kësaj njësie shënon një hap të rëndësishëm në forcimin e bashkëpunimit ndërmjet Doganës dhe Policisë, duke mundësuar koordinim më të drejtpërdrejtë, shkëmbim më efikas të informacionit dhe veprime të përbashkëta në kontrollin e pasagjerëve dhe ngarkesave në aeroport. Njësia është themeluar në kuadër të Veprimit të Përbashkët BE–UNODC për promovimin e sundimit të ligjit dhe qeverisjes së mirë përmes masave të synuara të kontrollit kufitar në portet dhe aeroportet e Evropës Juglindore – Faza II, i cili zbatohet nga UNODC me partnerë ndërkombëtarë. Projekti synon forcimin e kapaciteteve të autoriteteve të Ballkanit Perëndimor për parandalimin dhe adresimin e krimit të organizuar, trafikimit të paligjshëm dhe terrorizmit përmes përgjigjeve të koordinuara të institucioneve të zbatimit të ligjit në kufi”, thuhet në njoftimin e Doganës së Kosovës.
Ceremonia e hapjes u zhvillua me pjesëmarrjen e Drejtorit të Përgjithshëm të Doganës së Kosovës, Agron Llugaliu, Policisë së Kosovës përfaqësuar nga Samedin Mehmeti, si dhe përfaqësuesit të UNODC-së, si dhe kreu Bashkëpunimit i Bashkimit Evropian në Kosovë, Hubert Perr, të cilët së bashku hapën zyrtarisht hapësirat e Njësisë së Përbashkët të Kontrollit.
