Një zjarr ka shpërthyer në territorin e Parkut Kombëtar “Sharri”, në zonën nën majën e Vrtopit, në një lartësi prej rreth 2 mijë e 500 metrash mbi nivelin e detit.
Kryetari i Prizrenit, Shaqir Totaj, ka bërë të ditur se ekipet përgjegjëse kanë dalë në terren për të vlerësuar situatën dhe për të marrë masat e nevojshme për kontrollin e zjarrit.
Në vendngjarje janë angazhuar Drejtoria e Emergjencave dhe Sigurisë, Policia e Kosovës, përfaqësues të Parkut Kombëtar “Sharri”, si dhe Njësia e Zjarrfikësve dhe Shpëtimit.
Ndërhyrja po vështirësohet nga terreni i thepisur dhe i paarritshëm, ndaj institucionet po bashkëpunojnë për të parandaluar përhapjen e mëtejshme të flakëve. Për monitorimin e zonës është aktivizuar edhe një ekip me dronë, përmes të cilëve po përcillet gjendja në terren dhe po ndihmohet koordinimi i veprimeve.
Totaj ka apeluar te qytetarët që të tregojnë kujdes të shtuar dhe të mos ndezin zjarre në hapësira të hapura.
“Një sjellje e papërgjegjshme rrezikon natyrën, pyjet, jetën dhe pasurinë e banorëve, ndërsa një veprim i tillë është edhe i dënueshëm”, ka deklaruar ai.
