Prishtina ka vazhduar serinë e fitoreve në Superligën e Kosovës, pasi të dielën mbrëma e ka mposhtur Feronikelin 74 me rezultat 3:0 në kuadër të xhiros së gjashtë.
Ndeshja është zhvilluar në stadiumin “18 Qershori” në Klinë, ndërsa kryeqytetasit e kanë regjistruar fitoren e pestë radhazi në kampionat.
Heroi i takimit ka qenë Assane Diatta, i cili ka shënuar dy gola. Senegalezi e ka zhbllokuar rezultatin në minutën e tridhjetë e tretë me një supergol me gërshërë, pas asistimit të Arijanit Fazlijës, duke mposhtur portierin Agron Kolaj.
Prishtina e ka dyfishuar epërsinë në minutën e gjashtëdhjetë e një. Këtë herë Fazlija ka realizuar me kokë pas një harkimi të Albin Krasniqit.
Golin e tretë dhe të fundit e ka shënuar sërish Diatta në minutën e nëntëdhjetë e dytë, duke vulosur fitoren bindëse të skuadrës së kryeqytetit.
Me këtë sukses, Prishtina kryeson renditjen me pesëmbëdhjetë pikë dhe ka një ndeshje më pak të zhvilluar. Ndërkohë, Feronikeli 74 mbetet në pozitën e parafundit me vetëm tri pikë.
Në ndeshjen tjetër të së dielës, derbi i Anamoravës mes Dritës dhe Gjilanit ka përfunduar pa fitues. Dy rivalët lokalë barazuan 0:0, duke ndarë nga një pikë në një duel ku munguan golat.
