Komuna e Prishtinës dhe UNICEF-i kanë nënshkruar Memorandum Bashkëpunimi për forcimin e planifikimit, buxhetimit dhe shërbimeve në arsim, shëndetësi dhe mbrojtje sociale, me vëmendje të veçantë ndaj fëmijëve më të cenueshëm.
Memorandumi është nënshkruar nga kryetari i Prishtinës, Përparim Rama, dhe Shefja e Zyrës së UNICEF-it në Kosovë, Veronika Vashchenko.
Sipas Komunës së Prishtinës, ky partneritet konkretizon angazhimin e përbashkët për një Prishtinë që kujdeset për çdo fëmijë.
“Përmes këtij partneriteti do të forcohen planifikimi, buxhetimi dhe shërbimet në arsim, shëndetësi e mbrojtje sociale, me vëmendje të veçantë ndaj fëmijëve më të cenueshëm”, thuhet në njoftim. “Fëmijët në qendër të politikave tona”, theksohet mes tjerash.
