Prokuroria Speciale ka ngritur aktakuzë ndaj N.H. për tri vepra penale, duke e akuzuar se gjatë viteve 2021-2023, në cilësinë e personit zyrtar në Ministrinë e Mjedisit, ka tejkaluar kompetencat ligjore dhe i ka shkaktuar dëm buxhetit të shtetit në shumën prej rreth 15.7 milionë euro.
Prokuroria Speciale e Republikës së Kosovës ka ngritur aktakuzë ndaj të pandehurit N.H. për veprat penale “Keqpërdorimi i pozitës apo autoritetit zyrtar”, “Shpëlarja e parave” dhe “Mosraportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare”.
Po ashtu, është ngritur aktakuzë ndaj I.B. për veprën penale “Mbajtja në pronësi, kontroll ose posedim të paautorizuar të armëve”.
Sipas aktakuzës, N.H., gjatë viteve 2021-2023, në cilësinë e personit zyrtar në Ministrinë e Mjedisit, “ka tejkaluar kompetencat ligjore dhe nuk i ka përmbushur detyrat zyrtare”.
Sipas Prokurorisë, ai ka vepruar me qëllim që operatorëve ekonomikë të caktuar, ambalazhues të ujit, “t’u mundësojë përfitime pasurore të kundërligjshme”, duke i shkaktuar dëm buxhetit të shtetit në shumën e përgjithshme prej 15.752.486,07 euro.
I pandehuri akuzohet se nuk i ka dërguar të gjithë operatorët ekonomikë në vlerësim të Grupit punues Ministror.
“Ndërsa, pas pranimit të raportit nga ky grup, N.H operatorët me qëllim të favorizimit i ka selektuar në tri grupe, duke u mundësuar që detyrimet financiare të përcaktoheshin mbi bazën e raportimeve të tyre të paverifikuara”, thuhet në aktakuzë.
Po ashtu, i pandehuri nuk i ka zbatuar vlerësimet e Grupit punues në caktimin e borxheve të operatorëve, “duke i zvogëluar detyrimet financiare për shfrytëzimin e ujit”.
