Një shtetas kosovar i kërkuar me fletarrestim ndërkombëtar është ekstraduar nga Italia në Kosovë, ka njoftuar Policia e Kosovës.
Sipas njoftimit, Drejtoria për Bashkëpunim Ndërkombëtar Policor, në bashkëpunim me njësitet relevante të Policisë së Kosovës dhe institucionet e drejtësisë, ka realizuar më 6 tetor ekstradimin e shtetasit me inicialet S.S.
“I dyshuari ishte arrestuar nga autoritetet italiane pasi që i njëjti kërkohej përmes INTERPOL-it me letër rreshtim ndërkombëtar lëshuar nga institucionet e drejtësisë së Kosovës, për veprën penale ‘Pjesëmarrje në grupin e organizuar kriminal’ dhe ‘Kontrabandë me emigrantë’”, thuhet në njoftim.
Policia ka bërë të ditur se ekstradimi është realizuar në bazë të legjislacionit në fuqi dhe falë bashkëpunimit ndërmjet institucioneve të Kosovës dhe atyre të Italisë.
Pas ekstradimit, i dyshuari i është dorëzuar njësive përkatëse të Policisë së Kosovës në rajonin e Gjakovës, për vazhdimin e procedurave të mëtejshme ligjore.
