Ambasada e Gjermanisë në Prishtinë thotë se i sheh me shqetësim ndryshimet në ligjin për Dhomat e Specializuara të Kosovës.
Zëdhënësja e Ambasadës së Gjermanisë, Catalina Heine, tha për RTKLive se Dhomat e Specializuara të Kosovës janë një institucion i pavarur gjyqësor dhe se pavarësia e tyre duhet të ruhet plotësisht.
“Dhomat e Specializuara të Kosovës janë një institucion i pavarur gjyqësor, hibrid, i themeluar përmes ligjit të Kosovës dhe i sanksionuar në Kushtetutën e Kosovës. Qëllimi i tyre është të sigurojnë llogaridhënie dhe drejtësi për viktimat nga të gjitha komunitetet në Kosovë. Për të përmbushur këtë mision, pavarësia e tyre duhet të ruhet plotësisht. Në përputhje me BE-në, ne i shohim me shqetësim të thellë ndryshimet në ligjin për Dhomat e Specializuara të Kosovës”, tha ajo.
Ndryshe, Kuvendi i Kosovës, në një seancë të jashtëzakonshme, mbrëmë ka votuar ndryshimet e Projektligjit nr. 11/L-001 për ndryshimin dhe plotësimin e Ligjit nr. 05/L-053 për Dhomat e Specializuara dhe Zyrën e Prokurorit të Specializuar.
