Në Beograd protestuan kundër kufizimeve të së drejtës së votës për serbët që jetojnë jashtë vendit
Më shumë se 1000 persona protestuan më 7 tetor para Komisionit Republikan të Zgjedhjeve (KRZ) në Beograd, kundër kufizimeve për votimin e serbëve që jetojnë jashtë vendit në zgjedhjet e parakohshme parlamentare të 25 tetorit, njofton Agjencia Telegrafike Bullgare (BTA). Komisioni Republikan i Zgjedhjeve ka ndryshuar vendndodhjen e qendrave të votimit jashtë Serbisë. Ato do të vendosen kryesisht në ambasadat dhe konsullatat serbe, çka do t’i detyrojë disa votues të udhëtojnë në distanca të gjata për të votuar. Gjithashtu, parashikohet që qendrat e votimit jashtë vendit të funksionojnë sipas orës astronomike të Serbisë. Si pasojë, shtetasit serbë që jetojnë në vende si Australia dhe Shtetet e Bashkuara të Amerikës do të detyrohen të votojnë gjatë natës, sipas orës lokale.
Për këto zgjedhje janë regjistruar për të votuar më shumë se 100 000 serbë që jetojnë jashtë vendit, ndërsa në zgjedhjet parlamentare të vitit 2023 ishin regjistruar rreth 40 000. Më 25 tetor, opozita studentore do të përballet me Partinë Progresive Serbe në pushtet, të drejtuar nga Aleksandar Vuçiç.
Kaja Kallas dhe Marta Kos
FOTO: EPABGNES
Brukseli bën thirrje për formimin e shpejtë të qeverisë pas zgjedhjeve në Bosnjë-Hercegovinë
Bashkimi Evropian u ka bërë thirrje përfaqësuesve të sapozgjedhur në Bosnjë- Hercegovinë që të marrin përgjegjësinë për formimin e shpejtë të institucioneve pas zgjedhjeve të përgjithshme të 4 tetorit, njofton portali hina.hr. Sipas shefes së diplomacisë së BE-së, Kaja Kallas, dhe komisioneres evropiane për zgjerimin, Marta Kos, zgjedhjet u zhvilluan normalisht. BE-ja i kërkon Bosnjë-Hercegovinës të ndërmarrë të gjitha hapat dhe reformat e nevojshme për të hapur negociatat e anëtarësimit në Bashkimin Evropian. Gjithashtu, Sarajevës i bëhet thirrje të shfrytëzojë plotësisht Planin e BE-së për rritjen e Ballkanit Perëndimor, në mënyrë që të shmangë humbjen e mëtejshme të fondeve. Përveç tre anëtarëve të Presidencës kolektive të Bosnjë-Hercegovinës, në këto zgjedhje u zgjodhën edhe deputetët e parlamentit shtetëror, si dhe të parlamenteve të dy entiteteve përbërëse të vendit: Republikës Sërpska dhe Federatës së Bosnjë-Hercegovinës.
Justina Shiroka-Pula
FOTO: Reuters
Pushteti dhe opozita zgjodhën Justina Shiroka-Pulën presidente të Kosovës
Në minutat e fundit të 6 tetorit, pak para skadimit të afatit për zgjedhjen e presidentit të Kosovës, Partia Demokratike e Kosovës (PDK), në opozitë, mbështeti kandidaturën e Justina Shiroka-Pulës për presidente të vendit. Kështu u shmangën zgjedhjet e tjera të parakohshme parlamentare. Justina Shiroka-Pula ka qenë ministre e energjisë në periudhën 2008–2011. Ajo ka qenë anëtare e PDK-së deri në vitin 2014. Që nga dhjetori i vitit 2025, ajo është gruaja e parë që drejton Akademinë e Shkencave dhe të Arteve të Kosovës. Si pjesë e marrëveshjes për zgjedhjen e presidentes, partia në pushtet, Lëvizja Vetëvendosje (LVV), ka votuar dhe mbështetur ndryshimet në Ligjin për Gjykatën Speciale në Hagë, të propozuara nga PDK-ja. Sipas portalit Koha.net, ndryshimet synojnë të kufizojnë kompetencat e gjyqtarëve ndërkombëtarë për ndjekjen penale të krimeve të luftës të kryera gjatë luftës së vitit 1999 për çlirimin e Kosovës.
FOTO: abc-corridor.com
Egjipti lidh Afrikën me BE-në përmes një korridori tregtar dhe logjistik në Ballkan
Një korridor i ri privat tregtar dhe logjistik lidh portet e Egjiptit me Ballkanin dhe tregjet e Bashkimit Evropian (BE), përmes Selanikut, Sofjes dhe Nishit. Nisma, e quajtur “Korridori Arabo-Ballkanik”, u prezantua në Kajro. Ajo është zhvilluar nga kompania holandeze BDS Holding BV, në bashkëpunim me Bashkimin e Dhomave Arabe. Sipas projektit, mallrat nga Egjipti do të transportohen me anije nga portet e Aleksandrisë dhe Port Saidit drejt Selanikut. Prej andej, ato do të vazhdojnë rrugën me tren dhe me kamionë, përmes Bullgarisë dhe Serbisë, drejt tregjeve evropiane. Sofja parashikohet të shërbejë si një qendër e rëndësishme logjistike për transportin hekurudhor, ndërsa Nishi do të jetë një pikë kyçe për shpërndarjen e mallrave në Serbi dhe në vendet e Ballkanit Perëndimor.
Korridori do të shfrytëzojë infrastrukturën ekzistuese të transportit. Lidhja hekurudhore dhe rrugore mes Nishit dhe Sofjes është pjesë e degëzimit të Korridorit Pan-Evropian X, njofton agjencia e lajmeve BGNEС.
FOTO: digi24.ro
Lig zgjeron mundësitë për vrasjen parandaluese të arinjve në Rumani
Presidenti i Rumanisë, Nikushor Dan, nënshkroi një ligj për zvogëlimin e numrit të arinjve në vend. Ligji lejon vrasjen parandaluese të 859 arinjve të murrmë deri në vitin 2027. Edhe 110 arinj të tjerë mund të vriten deri në fund të vitit 2026, nëse përbëjnë kërcënim. Vitet e fundit, arinjtë janë shfaqur gjithnjë e më shpesh në zonat e banuara të Rumanisë, ndërsa është rritur edhe numri i sulmeve, përfshirë rastet me pasoja fatale, njofton portali digi24.ro. Rumania është vendi me numrin më të madh të arinjve në Evropë, me një popullatë të vlerësuar nga 10 479 deri në 12 700 individë. Organizatat për mbrojtjen e natyrës protestojnë kundër ligjit dhe kërkojnë që, në vend që paratë të shpenzohen për vrasjen e arinjve, të punohet për sterilizimin e popullatës së tyre.
