TË PAKËN tre persona u vranë dhe katër të tjerë u plagosën në një sulm me dron rus që goditi një konvoj automjetesh në lagjen Holosijivski të Kievit këtë mëngjes. Informacioni u konfirmua nga autoritetet lokale, shkruan Kyiv Independent .
Sulm në autostradë pranë Kievit
Kryebashkiaku i Kievit, Vitaly Klitschko, tha se droni ra pranë një stacioni benzine. Shërbimi Shtetëror Ukrainas për Situata Emergjente publikoi të dhëna mbi viktimat dhe tha: “Armiku po sulmon përsëri në mënyrë cinike civilët. Pas çdo sulmi të tillë qëndrojnë jetë njerëzore, dhimbje dhe fate të shkatërruara.”
Zyra e prokurorit të rajonit të Kievit publikoi foto nga vendi i sulmit, të cilat tregojnë disa makina të djegura përgjatë autostradës Kiev-Odesa. Zyra e prokurorit njoftoi se kishte nisur një hetim për shkelje të ligjeve dhe zakoneve të luftës.
Tre të vdekur në Obuhiv
Shërbimet e emergjencës ukrainase raportuan një tjetër sulm më herët atë mëngjes. Tre persona u vranë dhe të paktën gjashtë u plagosën në një sulm ndaj një objekti prodhimi dhe magazinimi në Obuhiv, një qytet në jug të Kievit. Guvernatori i rajonit të Kievit, Timur Tkachenko, konfirmoi se dy gra dhe një burrë ishin midis viktimave. Ai shtoi se zjarri në ndërtesën e prekur u shua.
Sipas një deklarate nga Forcat Ajrore Ukrainase, Rusia sulmoi Ukrainën me 165 dronë Shahed dhe avionë të tjerë gjatë natës së 20 tetorit. Nga këta, 105 ishin me motor reaktiv. Forcat Ajrore thonë se 115 dronë rusë u rrëzuan ose u neutralizuan elektronikisht në 30 lokacione, 73 prej të cilëve ishin me motor reaktiv.
Kievi dhe qytete të tjera po bëhen gjithnjë e më shumë cak i dronëve me motor reaktiv, të cilët nuk u përdorën aq shumë dimrin e kaluar. Avionët janë më të shpejtë dhe fluturojnë në lartësi më të mëdha se modelet e vjetra ruse me helikë, duke i bërë ato më të vështira për t’u kapur nga mbrojtja ajrore ukrainase.
