Ministria e Brendshme Gjermane ka konfirmuar se do të shtrëngojë kriteret për dhënien e provimit të gjuhës gjermane, i cili është një parakusht kyç për marrjen e një leje qëndrimi të përhershme dhe më vonë shtetësisë gjermane. Arsyeja është numri në rritje i përpjekjeve për të kopjuar në provime, shkruan Deutsche Welle .
Rregullorja e re e ministrisë, të cilën e ka parë gazeta Bild, thotë se pjesëmarrësit në kursin e integrimit kanë marrë në mënyrë të paligjshme pyetje dhe zgjidhje për pjesët e dëgjimit dhe leximit të testit nëpërmjet internetit. Kjo pjesë përbëhet nga 45 pyetje me zgjedhje të shumëfishta.
Provimi përfshin edhe një pjesë me shkrim, ose shkrimin e një teksti të shkurtër, të cilin, sipas rregullores, pjesëmarrësit shpesh nuk e përfundonin fare. Pavarësisht kësaj, provimi konsiderohej i kaluar nëse kandidati arrinte një rezultat të mirë në pjesën e parë dhe e kalonte pjesën me gojë të provimit në nivelin B1.
Vitin e kaluar, 318,550 emigrantë e dhanë testin.
Prandaj, Ministria ka vendosur të shtrëngojë kërkesat për dhënien e provimit. Kandidatët tani do të duhet të demonstrojnë aftësi në të tre pjesët: dëgjim/lexim, shkrim dhe të folur. Në pjesën në të cilën janë më të dobët, do të duhet të përmbushin një nivel minimal A2. Provimi nuk do të konsiderohet më i kaluar nëse ndonjë pjesë nuk e arrin atë nivel.
Ndryshimet në “Rregulloren mbi Provimet e Kurseve të Integrimit” hyjnë në fuqi më 1 nëntor. Testi i Gjuhës Gjermane për Imigrantët (DTZ) është provimi përfundimtar në kurset e integrimit të organizuara nga Zyra Federale për Migracionin dhe Refugjatët (BAMF). Për të marrë një certifikatë kalimi të provimit, pjesëmarrësit duhet të arrijnë një rezultat të përgjithshëm prej A2 ose B1 sipas Kornizës së Përbashkët Evropiane të Referencës për Gjuhët.
Sipas të dhënave të BAMF-së, 318,550 emigrantë dhanë testin e gjuhës gjermane vitin e kaluar. Nga ky numër, 175,193 arritën nivelin B1, i cili lejon komunikimin në gjermanishten e përditshme. 102,663 kandidatë arritën nivelin e ulët A2, ndërsa 40,694 mbetën nën nivelin A2.
