Një vajzë trevjeçare është shpëtuar në qytetin kinez Zhangping pasi ishte varur nga dritarja e katit të 12-të, ku koka e saj mbeti e bllokuar midis shufrave metalike. Incidenti ndodhi katër ditë më parë, mëngjesin e 17 tetorit, dhe fëmija mbeti e varur nga jashtë ndërtesës. Videoja u bë virale në mediat sociale.
Një nga fqinjët e vuri re fëmijën, dërgoi menjëherë foto në grupin e përbashkët të bisedës së qiramarrësve dhe kërkoi ndihmë. Videoja tregon vajzën duke u mbajtur pas kangjellave me duar. Rojet e sigurisë dhe stafi i ndërtesës reaguan shpejt dhe hynë në apartamentin në katin e 11-të, direkt poshtë apartamentit ku ndodhej vajza.
Dy burra u përkulën nga dritarja dhe vendosën një karrige poshtë fëmijës, duke e mbështetur, duke i hequr peshën dhe duke e mbajtur të sigurt derisa mbërritën zjarrfikësit.
Banorët i thanë medias lokale se vajza ishte vetëm në shtëpi në kohën e aksidentit. Babai i saj ishte në punë dhe nëna e saj kishte shkuar në dyqan ndërsa fëmija po flinte.
Supozohet se vajza rrëshqiti nëpër hekura, pas së cilës koka e saj u ngec.
Me mbërritjen e zjarrfikësve, vajza u ul në një vend të sigurt dhe u transportua në spital për ekzaminim.
