Komuna e Prishtinës dhe Ambasada Britanike në Kosovë kanë nënshkruar memorandum mirëkuptimi për mbështetjen e bursave studentore “Chevening”, duke zgjeruar mundësitë për studentët kosovarë që të ndjekin studimet master në Mbretërinë e Bashkuar.
Ambasadori britanik në Kosovë, Jonathan Hargreaves, e cilësoi këtë marrëveshje si një hap të rëndësishëm në forcimin e partneritetit ndërmjet Kosovës dhe Mbretërisë së Bashkuar. Ai theksoi se gjatë dy dekadave të fundit, rreth 150 studentë nga Kosova kanë përfituar nga bursat “Chevening”, ndërsa tani Prishtina do të kontribuojë me dy bursa shtesë, të fokusuara në fusha si inteligjenca artificiale, siguria kibernetike dhe industritë kreative.
Sipas tij, kjo mbështetje do t’u japë më shumë të rinjve mundësinë të përfitojnë nga arsimi britanik dhe të rikthehen me njohuri e përvojë të re, duke kontribuar në zhvillimin e vendit.
Kryetari i Prishtinës, Përparim Rama, tha se ky bashkëpunim ka rëndësi të veçantë, duke kujtuar edhe përvojën e tij personale me sistemin arsimor britanik, të cilin e vlerësoi si të klasit botëror. Ai u shpreh se investimi në studentë është investim i drejtpërdrejtë për të ardhmen e qytetit dhe të Kosovës.
Rama shtoi se përfitimet nga ky partneritet nuk do të kufizohen vetëm te studentët, por do të ndikojnë edhe në forcimin e lidhjeve ndërmjet dy vendeve. Ai gjithashtu falënderoi qeverinë britanike për mbështetjen e vazhdueshme ndaj Kosovës, duke përmendur edhe bashkëpunimin në përgatitjet për Lojërat Mesdhetare 2030.
Ky memorandum synon të krijojë më shumë mundësi për të rinjtë kosovarë dhe të thellojë bashkëpunimin ndërkombëtar në arsim, inovacion dhe zhvillim.
