Sot në vendin tonë parashikohet mot kryesisht i vranët, me periudha me diell, derisa vende-vende priten edhe riga shiu.
Sipas Institutit Hidrometeorologjik të Kosovës temperaturat minimale do të lëvizin ndërmjet 4 dhe 6 gradë Celsius, ndërsa maksimalet nga 15 deri në 18 gradë Celsius. Era do të fryjë kryesisht nga verilindja me shpejtësi prej 1 deri në 6 metra në sekondë.
Sipas IHMK-së kushtet agrometeorologjike paraqiten përgjithësisht të favorshme për zhvillimin e kulturave bujqësore, sidomos për perimet pranverore, drithërat dhe pemëtarinë. Reshjet e herëpashershme pritet të ndihmojnë në ruajtjen e lagështisë në tokë.
Megjithatë, temperaturat më të ulëta gjatë orëve të mëngjesit në mesjavë mund të shkaktojnë stres te kulturat më të ndjeshme, veçanërisht në viset e ulëta dhe në lugina. Fermerëve u rekomandohet kujdes gjatë trajtimeve me preparate mbrojtëse, duke i realizuar ato në intervale pa reshje dhe me erëra të dobëta.
Sa i përket cilësisë së ajrit, ajo pritet të mbetet kryesisht e mirë deri mesatare në pjesën më të madhe të vendit, falë qarkullimit të masave ajrore dhe erërave të lehta që do të ndikojnë në shpërndarjen e ndotësve atmosferikë.
Në zonat urbane mund të ketë rritje të lehtë të koncentrimit të ndotësve gjatë orëve të mëngjesit dhe mbrëmjes, por sipas IHMK-së, pa ndikime të theksuara në shëndetin e qytetarëve.
