Forumi i Beogradit për Siguri dhe Demokraci (FBD) njoftoi sot se i sheh “me shqetësim” reagimet e Serbisë ndaj rritjes së tensionit në veri të Kosovës dhe vlerësoi se “besimi në Rusi është krejtësisht i pavend”.
Në një deklaratë, organizata ka saktësuar se kjo i referohet “veçanërisht kërkesave për kthimin e forcave serbe të sigurisë” në territorin e Kosovës.
“Në kontekstin aktual të politikës së jashtme, kërkesa të tilla kontribuojnë shumë më pak në de-përshkallëzimin e tensioneve në terren, aq sa kontribuojnë në përpjekjet dhe synimet për të diskredituar plotësisht BE-në si ndërmjetës në zgjidhjen e çështjes së Kosovës dhe marrëdhënieve ndërmjet Beogradi dhe Prishtina”, ka thënë FBD.
Ata theksuan se “do të ishte katastrofike për të ardhmen e Serbisë dhe anëtarësimin e saj në BE”, dhe mbi të gjitha, siç vlerësuan ata, “do të përkeqësonte pozitën e pakicës serbe në Kosovë”.
Ata gjithashtu vlerësuan se “besimi me zë të lartë në Rusi është plotësisht i gabuar” duke pasur parasysh, siç thanë ata, “diskreditimin politik dhe moral dhe kolapsin e Rusisë” si rezultat i agresionit të saj kundër Ukrainës.
Ata theksuan se është e rëndësishme që “Serbia t’i rezistojë presioneve të jashtme dhe të brendshme”, të cilat, siç thanë ata, “po e shtyjnë atë në drejtim të zgjidhjes së çështjes së Kosovës me metodat që Rusia përdori për të “mbrojtur” minoritetin rus në Ukrainë”. .
