Radhë kilometrash u regjistruan në urën që lidh Krimenë me Rusinë jugore, pasi sulmet ukrainase në gadishull u intensifikuan.
Qindra automjete presin në radhë për disa orë për t’u arratisur drejt Rusisë. Kulmi i trafikut u regjistrua të premten në mëngjes kur 2,800 automjete prisnin të largoheshin, pasi Ngushtica e Kerçit u mbyll përkohësisht për shkak të një sulmi me dron ukrainas gjatë natës, sipas të dhënave nga agjencia shtetërore Tass. Pothuajse dyfishi i makinave u përpoqën të largoheshin nga Krimea sesa të hynin brenda.
Ndërkohë, autoritetet ruse kanë shpallur gjendje të jashtëzakonshme në Krime, pasi sulmet ukrainase shkaktuan ndërprerje të energjisë elektrike dhe mungesë karburanti.
Guvernatori i qytetit, i emëruar nga Kremlini, Mikhail Razvozhaev, tha se kufizimet në furnizimin me energji elektrike do të mbeten në fuqi, ndërsa puna për riparimin e rrjetit elektrik u ndal për shkak të sulmeve ajrore të shkaktuara nga aktiviteti i dronëve ukrainas.
Komandanti i forcave të dronëve të Ukrainës, Robert Brovdi, tha se Kievi sulmoi nënstacionin kryesor në Sevastopol shtatë herë në orët e para të mëngjesit të së mërkurës.
Le t’ju kujtojmë se Rusia aneksoi Krimenë në vitin 2014, gjë që u dënua kryesisht nga bashkësia ndërkombëtare, pasi protestat e Maidanit çuan në rrëzimin e presidentit të atëhershëm pro-rus të Ukrainës, Viktor Janukoviç. Qyteti portual i Sevastopolit është selia historike e Flotës Ruse të Detit të Zi.
Me marrjen e detyrës në vitin 2019, Presidenti ukrainas Volodymyr Zelensky deklaroi se donte ta kthente Krimenë nën kontrollin e Ukrainës, dhe një retorikë e tillë u forcua më tej pasi Rusia nisi një pushtim në shkallë të plotë të Ukrainës në vitin 2022.
Çështja e Krimesë është një nga pengesat kryesore në çdo përpjekje për të arritur një marrëveshje midis Rusisë dhe Ukrainës për t’i dhënë fund luftës.
