Sekretari i Lidhjes Demokratike të Kosovës, Ilir Ferati, ka deklaruar se deri më tani nuk është deponuar asnjë nënshkrim për thirrjen e Kuvendit të jashtëzakonshëm të partisë, pavarësisht raportimeve në media.
Ai ka theksuar se lajmet e publikuara nuk kanë burime të besueshme brenda partisë.
“Deri më tani nuk ka asnjë nënshkrim të deponuar brenda zyrave të LDK-së”, tha Ferati.
Sipas tij, çdo kërkesë eventuale do të trajtohet me seriozitet nëse plotëson kriteret statutare, ndërsa theksoi se LDK-ja mbetet e fokusuar në themelimin e institucioneve të Kosovës.
Ferati gjithashtu u bëri thirrje zyrtarëve dhe anëtarëve të partisë që debatet t’i zhvillojnë brenda organeve të LDK-së dhe të shmangin deklarimet publike që, sipas tij, mund të shqetësojnë anëtarësinë.
“Më mbetet si Sekretar i LDK-së me bërë thirrje për qetësi, mendimet politike të ruhen brenda organeve të partisë”, u shpreh ai.
Ferati shtoi se kryetari Lumir Abdixhiku ka respektuar vazhdimisht procedurat statutare dhe ka kultivuar demokracinë brenda partisë.
